Kitail Kak Kilang Duwen Miniminpene Mehlel Ni Atail Kilang Video Cassette me Oaralap Koasoia “United By Divine Teaching”
Emen Sounapwalih en Circuit iang emen sister me kin onop Paipel rehn lih men me saikinte iang towehda mihding en mwomwohdiso. Sounapwalih menet luhke liho en kilang video cassette me oaralap koasoia “United by Divine Teaching.” Wihkohte, e iang towehda mihding ehu oh nda me e uhdahn perenki mihdingo. Dahme kahrehda video cassette wet kamwekid liho? Pwehki liho kilang duwen miniminpene mehlel nanpwungen Sounkadehdehn Siohwa kan mendahki re kin mihmi nan sampah me diren kailok oh tiahk lemei oh soahng pwukat inenen kamwekid ih.—Sohn 13:35.
Menlau kilang video cassette wet oh kilang oh pehm duwen meleilei oh limpoak me mihmi nanpwungen Sounkadehdehn Siohwa kan wasa koaros nan sampah. Oh pil, medemedewe duwen peidek pwukat:
(1) Dahme kahrehda “Padahk Sang Powe” wia oaralap me konehng ong kapokon kan me wiawi nan sampah erein pahr 1993 oh 1994?—Maika 4:2.
(2) Iaduwen padahk mehlel sang nan Paipel kawekila mour en ekei peneinei kan? Iaduwen e kawekila ahmw mour?
(3) Dahme kahrehda e kesempwal en mweidong Siohwa en kasukuhlih kitail?—Mel. 143:10.
(4) Soangen kahpwal dah kan ekei anahne powehdi ni arail kaunopada ong kapokon laud kan (Kapokon en International)?
(5) Iaduwen iren Paipel pwukat: Melkahka 133:1 oh Madiu 5:3 pweida ni ahnsou me kapokon kan wiawi me ke iangehr?
(6) Dahme kin kasansalehda me padahk kan sang powe kin kamwekid aramas akan?—Kaudiahl 7:9.
(7) Sangete mahs lel met, iahd me pwihn en Kristian mehlel kan me keieu tohto papidaisla?
(8) Mahsen dah kan en Maika, Piter oh Sises kin pweida rehn Sounkadehdehn Siohwa kan?
(9) Dahme kin kasalehda me aramas akan kak miniminpene oh ahneki peren mehlel oh meleilei nanpwungarail uhdahn pahn wiawi ehu rahn?
(10) Ihs me ke pahn kasalehong video cassette wet, oh pwekihda?
Mwurin emen sister kilang video cassette wet, e koasoia: “Video cassette wet sewese ie en tamataman me brother oh sister tohto wasa koaros nan sampah kin papah Siohwa ni lelepek ahnsou wette. . . . E kin inenen kaperen en kilang duwen miniminpene nanpwungen brother oh sister kan!”—Episos 4:3.