Ke Kin “Men” Sewese Meteikan?
1 Sises kin inenen nsenohki aramas akan. Ni ahnsou me ohl tokutok men peki rehn Sises en sewese ih, Sises ketin kapahla nin limeo oh doahke oh mahsanih: “Ei, I men sewese iuk. Nna, mwakelekelda.” (Mark 1:40-42, New World Translation) Ni ahl dah kan kitail kak kahlemengih sapwellimen Sises madamadau me pid sewese meteikan?
2 Aramas kan me Tepida Mwekidki Padahk Mehlel: Emenemen tohnmwomwohdiso kin sewese irail akan me tepida mwekidki padahk mehlel pwe ren kak wiahla tohnkaudok en Siohwa kan. Ni ahnsou me irail me kapw kan kin iang towehda mihding kan, ke kak rahnmwahuwih irail oh koasoiong irail. Ken medemedewe duwen ahl akan me ke kak kangoange irail. Kapinga irail ni ahnsou me re kin iang pasapeng kan. Oh pil, kapinga irail ni ahnsou me re kin nantihong kapwaiada kaweid en Paipel nan arail mour. Sewese irail en wehwehki me re kak kompoakepahki meteikan nan mwomwohdiso pwe tohnmwomwohdiso kan pahn mehlel ong irail.
3 Iengetail me Pwoson akan: E kesempwal kitail en keieu sewese “irail akan me kisehn atail pwoson” ni ahl tohto. (Kalesia 6:10) Irail me tohto kin nantihong powehdi soumwahu kan me re kin ahneki. Ma ke pahn mwemweitala rehrail, ke kak kangoange irail oh ke kak kihda soangen sawas me re anahne. Ekei irail mwein lelohng kahpwal akan nan arail mour. Ke kak kasalehda ahmw nsenohkin irail ni ahmw pahn karonge irail oh wia soangen lokaia me pahn kakehlailih irail. (1 Deselonika 5:14) Elder kan pil kin anahne atail sawas—oh kitail kak sewese irail ni atail pahn miniminiong irail. (Ipru 13:17) Ni atail pahn kasalehda soangen ngehnen “men sewese meteikan,” kitail pahn wia “inenen sawas laud” ong riatail brother oh sister kan.—Kolose 4:11.
4 Tohnpeneinei kan: Kitail en nantihong kahlemengih Sises ni atail pahn nsenohki irail akan me kisehn atail peneinei. Limpoak laud oh nsenoh kin kamwekid pahpa oh nohno kan en ‘kekeirada neirail seri kan ni kaiahn oh madamadau en Siohwa.’ (Episos 6:4) Seri kan kak sewese arail pahpa oh nohno kan ni arail pahn wia uwen me re kak en kaunopada mwadang ong onop en peneinei, mihding kan oh pil kalohk. Irail seri kan me laudla kak kahlemengih sapwellimen Sises limpoak ni arail pahn sewese arail pahpa oh nohno kan powehdi soangen kahpwal akan me kin kohsang irair en mahla. Ni ahl pwukat oh pil ahl teikan, kitail koaros kak “kapwaiada mahs pwukoa doadoahk ong pein atail peneinei.”—1 Tim. 5:4.
5 Ni ahnsou me kitail kin kahlemengih Sises nin duwen sewese meteikan, kitail kak katikitikala kahpwal akan oh kahrehong tohn atail peneinei oh tohnmwomwohdiso en miniminpene oh kerenpene. Oh pil, keieu kesempwal, kitail kin kawauwih Siohwa, me wia “pwarer en kansenamwahu koaros.”—2 Kor. 1:3.