Ke Kak Pil Iang Sawas?
1 Ahnsou koaros Siohwa kin rapahki ahl akan me E ketin kak sewesehki irail sapwellime ladu lelepek kan. (2 Kronikel 16:9; Aiseia 41:10, 13) Aiseia kasalehda me Siohwa kin duwehte silepen sihpw me kin poakpoake nah sihpw kan oh e ntingihdi: “E pahn ketin apwalih sapwellime pelin sihpw duwehte silepen sihpw men; e pahn ketikihpene sihmpwul kan, e pahn ketin apwalihekin irail nin lime; oh e pahn ketin kahre inarail kan ni keneinei.” (Aiseia 40:11) Kitail en tehkpene duwen ekei ahl kan me kitail kak kahlemengih sapwellimen Siohwa limpoak oh nsenohki aramas.
2 Sewese Irail me Kapw kan: Kitail kak sewese irail me kapw kan ni atail pahn werekiong irail oh kangoange irail oh pil kakehlaka irail. (Lepin Padahk 13:20) Emen brother tamanda ahnsou me e tepin iang towehda mihding kan oh miniminiong brother oh sister kan nan mwomwohdiso, e koasoia: “Ekei pak, mie peneinei ehu me kin luhke ie en iang arail onop en peneinei. Ni ahi kekeirada ni pali ngehn, mie pwopwoud pwulopwul ieu me kin Regular Pioneer me kin kalap luhke ie en iang ira kalohk rahn pwon. Se kin ahnsou koaros koasoakoasoia soahng ngenin kan oh met kin wia kangoang laud ong ie.” E pil kapataiong: “Mwohn ai wiahla emen Kristian, I kin kohla mwemweit ni pwong en Ni Alim oh Rahn Kaunop kan. Ahpw, ahi werekiong brother kan kin kaitarala ahi anahn en werek oh mwemweit.” Pwehki tohn mwomwohdiso kan kin kasalehiong brother menet limpoak oh nsenoh, met sewese ih en tengediong padahk mehlel oh kin kakehlailih ah pwoson, oh met e kin papah Siohwa nin duwen kisehn peneinei en Bethel.—Kolose 2:6, 7.
3 Kakehlaka Emen Emen: Mwein kitail kin tehkada me ahnsou mwahu en sewese meteikan kin kohda ni ahnsou me riatail brother oh sister kan kin lelohng irail apwal akan. Ke kak koasoanehdi emen sounkalohk soumwahu de mah men en iang uhk kalohk doadoahngki telephone de luhke ih en iang uhk kohla rehn aramas men me ke kin onop reh, mwein pil kahrehla aramas me ke onop reh en onop ni imwen sounkalohk soumwahu men de mah men? Ke lemeleme pahpa de nohno men me kin kahre nah kisin seri kan nan kalohk pahn perenki ahmw sewese ih? Mie irail kan me namenek me pahn perenki ahmw sawas ni ahnsoun pwurehng pwurala rehn aramas akan de pil ahnsou teikan nan kalohk? Ma kitail men kasalehda limpoak ong riatail kan oh kasalehda me kitail nsenohki irail, kitail pahn rapahki elen sewese irail oh kangoange irail.—Rom 14:19.
4 Sang ni atail pahn kahlemengih sapwellimen Siohwa limpoak oh nsenoh me e kin ketin kasalehiong sapwellime ladu kan, kitail pahn kakehlailihala en emen emen arail pali ngehn, sewese tohn mwomwohdiso en miniminpene ni limpoak, oh kawahuwih Siohwa Koht, Samatail limpoak me kin ketiket nanleng.—Episos 4:16.