Tamataman Irail me Mah kan me Lelepek
1 Mendahki Ana wia liohdi men oh wia mahmahla oh lelehr sounpahr 84, e “sohte kin katiasang mihmi nan Tehnpas Sarawio ahnsou koaros.” Ah lelepek kamwekid Siohwa en ketikihong ih kating tohrohr ehu. (Luk 2:36-38) Rahnwet, brother oh sister tohto kin duwehte Ana—iang towehda mihding kan koaros—mendahki irair apwal kan me irail kin lelohng. Ni ahnsou me irail me lelepek kan kin lelohng soumwahu de kahpwal akan pwehki arail mahla, irail kakete mworusala. Kitail en koasoiapene duwen dahme pahn kangoange irail oh sewese irail en kolokolete koasoandi mwahu en pali ngehn wet.
2 Mihding kan oh Kalohk: Ni ahnsou me meteikan kin, ni limpoak, kihda sawas en mehn peidaid, irail me mah kan me lelepek kin kak mengei en iang towehda mihding kan ahnsou koaros. Met kin kangoange irail me lelepek kan ni pali ngehn oh met pil kin wia kamwahu kan ong mwomwohdiso pwon. Ke kin iang wia doadoahk mwahu wet?—Ipru 13:16.
3 Kristian mehlel akan kin ahneki peren oh nsenamwahu ni ahnsou me irail kin iang kalohk ahnsou koaros. Ahpw, iang kalohk kaukaule kin wia mehkot apwal ong irail me mah kan oh irail me soumwahu laud kan. Ke lemeleme emen irail me mah kompoake pwukat kak iang uhk nan kalohk nin duwen “iengomw tohndoadoahk”? (Rom 16:3, 9, 21) Mwein ke kak luhke ih en iang uhk kalohk ni amwa pahn doadoahngki telephone de e kak iang uhk pwurala rehn aramas me men rong de iang uhk kohla rehn emen me ke onop Paipel reh. Ma brother de sister me maho kin anahne mihmihte ni imweo, iaduwen—aramas me ke onop Paipel reh kak kohla ni imwen brother de sister maho pwehn onop?
4 Onop oh Werekiong Meteikan: Ekei pak, ekei kin luhke irail me mah kan de soumwahu laud kan en iang arail onop en peneinei, de irail kin wia arail onop en peneinei ni imwen irail me mah de me soumwahu kan. Emen nohno kin wahla nah seri tikitik riemen ni imwen sister mah emen pwe irail en onop pwuhken Nei Pwuhk en Poadoapoad kan en Paipel, oh irail koaros kin perenki iang sister maho onop. Oh pil, aramas mah oh soumwahu kin perenki ma meteikan kin luhke irail ong iang irail mwenge oh pil iang irail ahnsou kan me irail pahn tuhpene ong koasoakoasoipene de mwemweitla rehn brother oh sister teikan. Ma irail me mah kan de soumwahu laud kan kin nohn luwet oh sohte kak koasoakoasoi ong meteikan ahnsou werei, mwein ke kak call irail (telephonela rehrail) de mwemweitla rehrail erein minit kei pwehn wadek ong irail, de iang irail kapakap, de pil ehukihong irail mehkot me wiawi (ekspiriens) me kangoange iuk ni pali ngehn.—Rom 1:11, 12.
5 Siohwa kin kesempwaliki irail me mah kan me lelepek ong Ih. (Ipru 6:10, 11) Kitail kak kahlemengih Ih ni atail pahn kasalehda atail pil kesempwaliki irail oh sewese irail en kolokolete koasoandi mwahu me pid arail pali ngehn.