Prokram Kapw en Kapokon Tohrohr en Rahn Ehu
1 Mendahki nuhs oh sounpadahk en sukuhl kan kin song en kasalehda me ahneki kepwe tohto me mwahu, Mahsen en Koht kin kangoange kitail en “Kepwehpwehki Doadoahk Mwahu.” (1 Tim. 6:18) Ih oaralap en prokram en Kapokon Tohrohr en Rahn Ehu me pahn tepida nan September 2002. Mehn kangoang dah kan kitail pahn ale ni atail pahn iang towehda kapokono?
2 Sounapwalih en Circuit pahn koasoia duwen ia wehwehn “En Kepwehpwehla Mwohn Silangin Koht,” oh e pahn interview ekei me kin nantihong pwehn kepwehpwehla ni pali ngehn. Nan keieun eh padahk rahno, brother men me mwemweitdo pahn kasalehda iaduwen sapwellimen Koht aramas akan kin “Doadoahk Mwahu nan Ahnsoun Rahk Wet.” Emenemen kitail pahn ale kangoang en medemedewe iaduwen kitail kak kalaudehla atail doadoahk nan ansoun rahk me Koht koasoanehdi ong atail ahnsou.
3 Kitail kin inenen perenki kitail Kristian pwulopwul kan me kin nantihong “kepwehpwehla” ni pali ngehn! Met kin kapinga Siohwa oh kin sewese irail me pwulopwul kan en koasoanehdi “poahsoan mwahu” ong ahnsou kohkohdo ong ale pwukoa kan me pid papah Siohwa. Padahk me oaralap koasoia “Kapinga me Pwulopwul kan Pwehki Irail kin Doadoahk Mwahu ni Arail Kapinga Siohwa” pahn kasalehda duwen doadoahk mwahu kan me Kristian pwulopwul kan kin wia nan pein ahmw wasa.
4 Ia imwilahn doadoahk mwahu pwukat? Brother me mwemweitdo pahn koasoia met nan kaimwiseklahn padahko me oaralap koasoia, “Nantihong Doadoahk Mwahu kan oh Paiekihda Kapai kan Sang Siohwa.” E pahn kawehwe duwen irair pahieu me kitail kak paiekihda kapai pwukat: (1) emenemen kitail, (2) nan peneinei, (3) nan mwomwohdiso, oh (4) nan pwihn en Sounkadehdehn Siohwa kan me mihmi wasa koaros nan sampah.
5 Irail me inoukihong Siohwa arail mour pahn kak papidais ni kapokono. Ma ke kaunopadahr pwehn papidais, menlau kehsehki Presiding Overseer mwadang.
6 Ni ahnsou me pakair wiawi duwen iahd kapokon pahn wiawi, menlau mwadang koasoanehdi ahmw koasoandi kan pwehn iang towehda rahno. Ken mwadang lel Kingdom Hall rahno pwehn kak iang koulki tepin koul oh kapakap. Ma ke pahn iang towehda rahn pwon en kapokono oh rong kanahieng padahk kan koaros me pahn wiawi, e pahn kakehlailih kitail pwehn kak nantihong elen mour me pahn kasalehda me kitail “kepwehpwe” mwohn silangin atail Koht, Siohwa.