Doadoahk Me Kin Kansenamwahu
1 Rohng sang nan Paipel kin kansenamwahwih koaros me kin ale kaweid sang ie oh doadoahngki nan arail mour. (Melkahka 19:7, 8) E kin sewese irail en saledek sang padahk likamw akan oh pil wiewia suwed kan oh e pil kin kihong irail koapworopwor ong ahnsou kohkohdo. Ahpw, kaidehn irailte me kin rong duwen Rongamwahuwo me kin paiekihda. Ahpw, pil irail akan me kin ehukihong meteikan duwen padahk mehlel sang nan Paipel kin pil paiekihda.—Lepin Padahk 11:25.
2 Perenki Wia Doadoahk en Kalohk: Sises kasalehda me irail me kak ale oh kapaikada mehn wisik en wia sapwellimen Krais tohnpadahk, me kin pil wehwehki iang wia doadoahk en kalohk oh katohnpadahk, irail me pahn “diarada kommoalparail.” (Madiu 11:29) E diarada me ni ahnsou me e kin kalohk ong aramas akan, e kin ahneki peren mehlel. E kin duwehte kisin mwenge ong ih. (Sohn 4:34) Ni ahnsou me e kadarala sapwellime tohnpadahk 70 ong kalohk, irail perenda pwehki irail kilang me Siohwa kin ieiang irail.—Luk 10:17.
3 Kristian tohto rahnwet kin pil perenki wia doadoahk en kalohk. Emen sister koasoia: “Ahi iang wia doadoahk en kalohk kin kaperen pwehki e kin sewese ie en wehwehkihda duwen kahrepen ahi mour. Ahi kapwunod oh kahpwal kan sohla kin wia mehkot kapwunod nan ahi madamadau ni ahnsou me I kin iang doadoahk en kalohk.” Pil emen sounkalohk me kin ngoangki doadoahk en kalohk koasoia: “Ahi iang doadoahk en kalohk . . . kin sewese kataman ong ie rahn koaros me Siohwa me mehlel oh kin nsenohkin ie oh kihong ie popohl oh peren mehlel me sohte kak kohsang ehu wasa tohrohr.” Kitail ahneki pwais tohrohr en wia “iengen Koht tohndoadoahk”!—1 Kor. 3:9.
4 Mehn Wisik Me Krais Kihong Kitail Kin Mengei: Mendahki Sises kaweidki Kristian kan en ‘nantihong pwe irail en keid nan wenihmw wetikitik,’ e sohte idingkihong aramas en wia daulih dahme irail kak wia. (Luk 13:24) Ahpw, ni limpoak, e ketin luhkei kitail en ‘ale oh kapaikada sapwellime mehn wisik.’ (Madiu 11:29, footnote) Irail me kin lelohng irair apwal akan kak ese me arail papah Siohwa ni mohngiong unsek, mendahki arail soh unsek, kin wia mehkot me Siohwa pahn kupwurperenki.—Mark 14:6-8; Kolose 3:23.
5 E kin kaperen en papah Koht emen me kin kalahnganki oh kesempwaliki soahng koaros me kitail kin wia ong Ih! (Ipru 6:10) Kitail anahne wia uwen atail kak koaros en papah Ih oh kihong Ih dahme keieu mwahu rehtail.