Prokram Kapw en Kapokon Tohrohr en Rahn Ehu

Kitail kin wadek oh kilang wasa koaros nan rahnpwukat me aramas kin anahne tamataman me irail anahne ahneki mohngiong me roson pwehn kak mour werei oh sohte pahn kalap soumwahu. Ahpw, kesempwal sang met, kitail anahne tehk duwen irair en atail mohngiong ni karasaras. Ihme kahrehda, e konehng oaralap en Kapokon Tohrohr en Rahn Ehu me pahn tepida nan September 2003 iei: “Papah Siohwa Ni Mohngiong Unsek.” (1 Kronikel 28:9) Dahme kitail kak kasikasik en sukuhliki nan kapokon wet?

Sounapwalih en Circuit pahn koasoia duwen “Sewese Meteikan en Papah Siohwa Ni Peren.” Interview kan pahn kasalehda duwen peren me kin kohsang sewese aramas me perenki rong oh onop Paipel. Koaros me kin iang towehda kapokon pahn perenki mehn kamweit oh kangoang me pahn kohsang keieun padahk me oaralap koasoia: “Pere Mohngiongatail Nan Sampah me Diren Kahpwal akan.” Kaimwiseklahn padahk en ni menseng pahn pidada papidais.

Mwurin souwas, padahko me oaralap koasoia: “Kihda Ahmw Sawas” pahn kasalehda iaduwen kitail kak sewese meteikan. Dahme pahpa oh nohno kan kak wia pwehn pere mohngiong en neirail seri kan sang irair suwed akan oh sewese irail en karanih Siohwa? Padahko me oaralap koasoia “Sewese Noumw Seri kan en Perenki Siohwa” pahn kasalehda duwen mehn sawas kan me pahn mwahu ong mour en ehuehu rahn oh pil pahn kasalehda iaduwen kitail kak doadoahngki mehpwukat.

Kitail kin doadoahngki mwahu mehn sawas koaros me Siohwa kin ketikihda pwehn sewese atail mohngiong ni karasaras en roson oh kehlail? Brother me pahn wia kaimwiseklahn padahk me oaralap koasoia: “Papah Siohwa Ni Atail Kin Ahneki oh Kolokol Mohngiong Unsek Ong Ih,” pahn kasalehda duwen soahng pahieu me kitail anahne wia pwehn kolokol atail koasoandi en kaukaule kakehlailih atail pali ngehn. Ia uwen laud ahnsou oh nanti me kitail kin kihda ong kapakap ngidingid, onop Mahsen en Koht, kalohk ni ngoang, oh miniminiong Kristian teikan? Kitail kak kamwahuwihala pein atail koasoandi ni ahl pahieu pwukat?

Siohwa kin luhke kitail ni e mahsanih: “Mweidohng mohngiongomw en rong kaweid oh salengemw en rong loalokong.” (Lepin Padahk 23:12, New World Translation) Koasoanehdi ahmw koasoandi kan met pwe ken iang towehda rahn me pahn dirkihla kaweid sang nan Pwuhk Sarawi. Ma ke pahn wia met, dahme ke pahn rong pahn kakehlailih uhk en nantihong papah Siohwa sang mohngiong unsek oh pil peren mehlel.