Kaukaule Iang Towehda Mihding kan Koaros—Wiewia Kesempwal Ieu
1 Peneinei en Kristian akan kin kesempwaliki kaukaule iang towehda mihding en mwomwohdiso kan. Ahpw rahnwet, “anahn akan en atail mour” kin wia iren kahpwal ehu ong kitail. Doadoahk en nan ihmw, doadoahk en mwohni, de homework kin tepida kihsang atail ahnsou me kitail kin koasoanehdi ong atail kaudok ong Siohwa? Ma kitail pahn kilang mehpwukat nin duwen Siohwa kin ketin kupwurki, met pahn kak sewese kitail en tamatamante dahme kitail kin keieu kesempwaliki.—1 Samuel 24:6; 26:11.
2 Ohl emen en Mehn Israel wesewesei tuwi ni rahnen Sapad, oh e sohte kesempwaliki medemedewe duwen kupwuren Siohwa. Mwein e kin ahneki madamadau ieu me e kin wia doadoahk wet ong eh peneinei de e wiahda sapwung tikitik ieu. Ahpw kadeik me kohwong ohl menet, kin kasalehda me Siohwa sohte kin kupwurki aramas akan me kin wia doadoahk soh-kesempwal kan ni ahnsoun kaudok ong Ih.—Nempe 15:32-36.
3 Powehdi Kahpwalo: Ong aramas tohto e kin apwal en dehr mweidong arail doadoahk en mwohni en kauwehla arail ahnsou en iang towehda mihding kan. Ekei aramas kin powehdi kahpwal wet ni ahr kin koasoiong arail kaun en doadoahk kan, oh irail kin wilianda ahnsoun doadoahk kan rehn iengarail tohndoadoahk kan, de re kin rapahki ehu doadoahk me pahn mwahu ong mihding kan, de irail kin kihsang nan arail mour soahng soh katepe kan. Ni mehlel, soangen tohnmetei kan ong kaudok mehlel kin kaperenda Koht.—Ipru 13:16.
4 Homework kak pil wia kahpwal ehu ong tohnsukuhl akan. Pwulopwul emen koasoia, “I kin wia ai homework mwohn mihding kan oh I kin kanokehla ai onop en sukuhl ni ahnsou me I pwurodo sang mihding kan.” Ma irail sohte kak kanokehla ahr onop en sukuhl ni rahn en mihding kan, ekei pahpa oh nohno kan kin kawehwe ong sounpadahk kan me ahr peneinei kin kesempwaliki mihding en Kristian akan.
5 Doadoahkpene oh wiahda koasoandi mwahu ieu kin kak sewese peneinei kan en kanokehla ahr pwukoa de doadoahk kan nan imwarail, pwe irail sohte pahn pwand ong mihding kan. (Lepin Padahk 20:18) Seri pwulopwul kan pil kak ale kaiahn en kaunopada oh likouda ni kuloak me pahpa oh nohno pahn koasoanehdi ong irail. Mehn kahlemeng mwahu en pahpa oh nohno kan kin kasukuhliki neirail seri kan duwen kesempwalpen mihding kan.—Lepin Padahk 20:7.
6 Pwehki kahpwal akan en koasoandi suwed wet kin wie lalaudla, e kesempwal kitail en kaukaule iang towehda mihding en mwomwohdiso kan. Eri, kitail en nantihong kilangwong mehpwukat nin duwen kupwuren Siohwa oh kesempwaliki atail kaukaule iang towehda mihding kan koaros.—Ipru 10:24, 25.