Tehk Pwe Ken Mwohneki Mahs Dahme Kesempwal!
KOMWI emen ohl pwopwoud oh pahpa men. Ni ahnsou me ehu rahn en doadoahk laud kereniongehr imwisekla, ke tamanda mihding en mwomwohdiso me koasoandiong en wiawi ni soutuko. Ma ke mwadang mwesel sang doadoahk, e pahn mie omw ahnsou laud en duhdu, welianda omw likou, oh ekis mwenge mwohn omw mwesellahng mihding. Ahpw, omw kaun en doadoahko aluhdo rehmw oh pekih rehmw en wiahte doadoahk mwurin omw awahn doadoahk en rahno nek. E inoukihong uhk me e pahn pwain uhk laud. Ke anahne mwohnio.
De komwi emen lih pwopwoud oh nohno. Ni omw kaukaunop mwengehn ni soutuko, ke kilangada koaskoasok en likou kan me saikinte aihnda, oh ekei anahn ong lakapw. Ke kalelepek pein rehmw, ‘Ma I iang mihding pwohnget, ahnsou dah me I pahn kak aihn?’ Pwehki omw ahpwtehn alehdi doadoahk en mwohni kaukaule ehu, ke kin esehda ia uwen eh apwal en apwaliala pwukoah kan en nan ihmw oh ni ahnsouwohte doadoahk en mwohni pwehn apwalihki mouren peneinei.
De kowe emen tohnsukuhl. Nan omw perehn meir, noumw doarepwehn sukuhl kan kin koaskoasokda pohn omw tehpel. Pali tohtohn doarepwehn sukuhl pwukat kohieng uhk wereilahr, ahpw ke kin kihkihdi sohte wiahda, oh ahnsouwet mie assignment tohto me anahneiehr ken kapwurelahng omw sounpadahk. Ke men pekih rehn omw pahpa oh nohno ma re kak mweidohng uhk en mihmi oh sohte iang mihding pwe ken kanekehla doarepwehn sukuhl pwukat.
Mehnia me ke pahn mwohneki mahs: katohtohla awahn omw doadoahk en mwohni, aihn, homework, de mihding en mwomwohdiso? Ia wehwehn, ni pali ngehn, en mwohneki dahme kesempwal? Ia lamalam en Siohwa?
Dahme Ke Pahn Mwohneki Mahs?
Mwurinte mehn Israel kan alehdi Kosonned Eisek ko, ohl emen dierekda eh wesewesei tuwi ni rahn en Sapad. Met inenen keinapw nan Kosonnedo. (Nempe 15:32-34; Deuderonomi 5:12-15) Iaduwen omw pahn tenekih ire wet? Ke pahn mahkohng ohlo, ni omw pahn kose me dene, e sohte kin wia doadoahk wet pwehn kak ahnekihla mouren kepwehpwehla, ahpw e wia doadoahk wet pwehn apwalihki anahn akan en ah peneinei? Ke pahn nda me pwehki mie ahnsoun kasarawih rahn en Sapad tohto nan nan erein pahro, eri mahk en kohieng pwehki ohlo sohte pilahn mwahu ong ire wet, me kahreong en katiasang kasarawih rahn en Sapado?
Siohwa kin ketin kesempwalki ire wet. Paipel mahsanih: “Kauno [“Siohwa,” NW] eri mahsanihong Moses, ‘Aramas menet pahn kamakamala.’” (Nempe 15:35) Dahme kahrehda Siohwa mwekidkihda laud dahme ohl menet wia?
Mie rahn weneu me aramas kan kak wesei tuwi iangahki kadoahke arail anahn kan me pid mwenge, likou, oh wasahn kousoan. Rahn keisuhwo kin katohrohralahng arail anahn en pali ngehn. Nindoken e sohte sapwung en wesei tuwi, e sapwung en doadoahngki rahno me katohrohrala ong kaudok ong Siohwa en wiahla arail rahn en wesei tuwi. Mendahki Kristian kan sohte mih pahn Kosonned en Moses, ire wet soh padahkihong kitail mehn kasukuhl ehu me kitail en koasoanehdi dahme kitail pahn mwohneki nan atail mour rahnwet?—Pilipai 1:10.
Mwurin arail mihmihki nan sapwtehn erein sounpar 40, mehn Israel kan kaunopadahngehr en pedolong nan Sapwen Inou. Ekei pwangakihdahr kangkang manna me Koht ketikihong irail nan sapwtehn oh ni mehlel kin kilikilangwohng mwenge kan me wekisang met. Pwehn sewese irail kolokolte arail lamalam pwung nindoken arail pahn pedolong nan sahpwo “me diren milik oh sukehn loangalap,” Siohwa katamankihong irail: “Kaidehkte kisin tungoal me aramas akan kin mourki, pwe soangen mahsen koaros me kin pwilisang nin silangin Kauno [“Siohwa,” NW].”—Eksodus 3:8; Deuderonomi 8:3.
Mehn Israel kan anahne doadoahk laud pwe ren kak ale kanarail “milik oh sukehn loangalap.” Mie karis en sounpei kan me re anahne kalowehdi, oh ihmw kan me re anahne kauwada, oh mwaht akan me re anahne padokedi. Mendahki met, Siohwa kehkehlingkihong aramas kan en katohrehla ahnsou ehuehu rahn pwe ren kin doudouloale ire kan me ngehnin. Re pahn pil koasoanehdi ahnsoun padahkihong neirail seri kan elen Koht kan. Siohwa ketin mahsanih: “Kumwail padahkihong noumwail seri kan [sapwellime kosonned akan]. Koasoia nan imwamwail oh wasa teikan, ni ahnsoun kommoal oh ni ahnsoun doadoahk.”—Deuderonomi 11:19.
Kehkehlik kin wiawihong ohl koaros en Israel iangahki ohl proselyte kan koaros nan sahpwo en kin pokonpene pwehn kaudokihong Siohwa pak siluh nan sounpar ehu. Ni arail kin wehwehki me arail peneinei pwon pahn paiekihda ni pali ngehn soahngen ahnsou pwukat, tapwin peneinei tohto kin koasoanehdi me arail pwoud oh neirail seri kan en iang irail kohla kaudok. Ahpw ihs me pahn pere imwarail kan oh arail mwaht akan sang imwintihti kan ni ahnsou me peneinei koaros kohla kaudok? Siohwa ketin inoukihda: “Sohte emen me pahn men song kalowehdi sapwamwail nindoken amwail pahn kin wiewia sarawi siluh pwukat.” (Eksodus 34:24) Mehn Israel kan anahne pwoson pwe ren kamehlele me ma irail pahn mwohneki mehkan me ngehnin, re sohte pahn katiasang mehkot ni war. Siohwa kin mehlel ong sapwellime mahsan? Ehi!
Rapahki Mahs Wehin Koht
Sises padahkihong sapwellime werek kan en mwohneki mwohn mehkoaros mehkan en pali ngehn. Nan ah Kapahrek Pohn Dohl, e kaweidiki irail kan me rongorong ih: “Eri, kumwail dehr kin pwunodki ndinda, ‘Se pahn kihsang ia at tungoal kisin mwenge, de nimat pihl? Se pahn diar ia at likou?’ . . . Eri, kumwail rapahki mahs Wehin Koht oh dahme e kin ketin kupwurki, a soahng teikan koaros [anahn akan en pali war] e ahpw pahn ketikihong kumwail.” (Madiu 6:31, 33) Mwurinte en Sises pwoula, Kristian kan me ahpwtehn papidaisla kin idawenla kaweid wet. Pali moron en irail iei mehn Suhs kan de mehn liki kan me wekiohng lamalam en mehn Suhs me seiloaklahng Serusalem pwehn kasarawih kamadipw sarawi en Pendekos nan pahr 33 C.E. Nindoken arail mihmi wasao, mehkot kapwuriamwei wiawi. Re rong oh pwosonla rongamwahuwo duwen Sises Krais. Pwehki arail ngoangki kalaudehla arail sukuhlki arail pwoson me re ahpwtehn alehda, re mihmihte nan Serusalem. Kenerail mwenge kan malaulaula, ahpw anahn en paliwar kan kaidehn ih me keieu. Re diaradaiehr Mesaia! Riarail Kristian brother kan kin ehukihong irail arail dipwisou kan pwe irail koaros en kak pouselahte “poadidiong ale padahk sang rehn wahnpoaron ko oh . . . iang kapakap.”—Wiewia 2:42.
Kedekedeo, ekei Kristian kan pohnsowehla anahnepen en kaukaule werekiong riarail kan nan mihding. (Ipru 10:23-25) Ele re noahrokehda kepwe kan, oh pohnsowehla mehkan ni pali ngehn nindoken ahr kin nannanti pwehn katengehdiong pein irail oh arail peneinei arail pelien mwohni. Mwurin ah kangoangehkin rie Kristian kan en dehr tokedihsang iang towehda mihding kan, wahnpoaron Pohl ntingihdi: “Kumwail dehr noahroke mwohni, ahpw kumwail nsenamwahukihte dahme kumwail ahneki. Pwe Koht mahsanih, ‘I sohte pahn mweisang uhk; I sohte pahn keseiukala.’”—Ipru 13:5.
En Pohl kaweid me konehng ahnsouwo. Mpen sounpar limau mwurin Pohl ntingihdi nah kisinlikou ong mehn Ipru kan, karis en sounpei en mehn Rom Cestius Gallus kapilpene Serusalem. Kristian lelepek kan tamanda en Sises peneu: “Kumwail pahn kilang [met] . . . , Aramas emen me mihmi pohn imwe, e sohte pahn kohdihsang pwe en ale mehkot loale. Me mihmi nansapw sohte pahn pwurodohng ale eh likou.” (Mark 13:14-16) Re ese me arail pitla kin poahsoanda, kaidehn pohn tengeteng en arail doadoahk en mwohni de pohn kesempwal en arail kepwe kan, ahpw e kin poahsoanda pohn arail peikiong kaweid kan en Sises. Irail ko me peikiong kaweid en Pohl oh mwohneki mehkan en pali ngehn kin ni mehlel diarada me e mengei en pwilikihdi ihmw kan, doadoahk en mwohni kan, oh likou kan, oh pein arail kepwe kesempwal kan oh tenge pohn nahna kan sang irail ko me sohte kin saledek sang arail poakohng mwohni.
Iaduwen Ekei Kin Mwohneki Mehkan me Kesempwal Rahnwet
Kristian lelepek kan nan rahnwet kin kesempwalki kaukaule werekiong riarail Kristian kan, oh me tohto kin wiahda tohnmetei kan pwe ren kak towehda mihding kan. Nan ekei sahpw akan, ihte elen doadoahk en mwohni me mie iei doadoahk me emen kin welian emen wia soahngen doadoahkohte mwurin awa me kilelediong emenemen ira en koadoahke. Emen brother pekih en weliandi ienge tohndoadoahk kan oh doadoahk pwong en Rahn Kaunop kan, me pali moron en aramas kan nan ah wasa kin men doadoahngkihong ahnsou mwemweit, ma irail pahn uhd wiliandi ih oh doadoahk pwohng en mihding kan. Brother teikan me kin ahneki soahngen doadoahk wet me kin welian meteikan kin iang towehda mihding kan en ehu mwomwohdiso me kerenih arail wasahn doadoahk ma arail doadoahk kin iredi irail sang en iang towehda mihding kan nan pein arail mwomwohdiso. Ni ahl wet, re kin kereniong ahnsou koaros iang towehda mihding. Emen me ahpwtehn onop nan Canada mwadangete pohnesehda duwen kesempwalpen sukuhl en Theocratic Ministry School oh Service Mihding, ahpw ah koasoandi en doadoahk kin koarompwa ah iang towehda mihding. Ihme karehda, e kin pwain emen ienge tohndoadoahk en welian ih doadoahk ni eh ahnsoun doadoahk pwe en kak iang towehda mihding kesempwal pwukat.
Me tohto me kin kohwahki soumwahu sohte kin kalapw katiasang mihding kan. Re kin rong prokram en mihding kan nan imwerail sang ni telepohn de sang ni deihp rekord kan ma irail sohte kak iang kohla nan Kingdom Hall. Re kin kasalehda arail kalahnganki sapwellimen Siohwa sawas en pali ngehn kan me sapwellime “pwihn en ladu lelepek oh loalokong” kin ketikihda! (Madiu 24:45) Kristian kan me kin apwalih arail pahpa oh nohno me likeilapalahr kin uhdahn kalahnganki ma brother men de sister men kin uhd mihmi rehn arail pahpa oh nohno pwe neira ko me kin apwalih ira en kak iang towehda mihding en mwomwohdiso.
Pilahn Mwowe!
Pahpa oh nohno kan me kin pohnese pein arail anahn en pali ngehn kin sewese neirail seri kan en kalahnganki mihding en Kristian kan. Nin duwen kosonned ehu, re kasik me neirail seri kan en wiahda neirail homework kan me kohieng irail oh dehr kihkihieng ahnsoun wia assignment pwukat. Ni rahn kan me mihding pahn wiawi ni pwong, seri kan pahn mwadang wiahda arail homework kan mwurinte arail pwurodo sang sukuhl. Mehn kamweit kan oh wiewia teikan sohte pahn mweimwei en kedirepwe mihding en mwomwohdiso kan.
Nin duwen ohl pwopwoud men oh pahpa men, ke kin mwohneki iang towehda mihding? Nin duwen lih pwopwoud men oh nohno men, ke kin pilanihda omw pwukoah kan pwe ken kak iang towehda mihding? Nin duwen me pwulopwul men, ke kin kesempwalki mihding kan laud sang omw homework kan de ke kin kesempwalki homework kan laud sang mihding kan?
Mihding en mwomwohdiso kin wia sawas limpoak ehu sang rehn Siohwa. Kitail en nannanti pwe kitail en iang kisehn koasoandi wet. Siohwa pahn kapaiuhkada ma ke pahn mwohneki mahs mehkan me kesempwal!
[Kilel nan pali 29]
Ni soutik en rahnwet pahn mie mihding, ahpw miehte doadoahk me ke kak wia. Eri, dahme ke pahn mwohneki?