Kahlemengih Lamalam me Sises Kin Ketin Sapwellimanki
1. Soangen lamalam dahieu me Sises kin ketin sapwellimaniki?
1 Mendahki kitail saikinte kilang Sises, kitail kak poakohng ih pwehki kitail wadek sang nan Paipel duwen eh mour oh dahme e wia nan sapwellime doadoahk en kalohk. (1 Piter 1:8) E ketikihdi deue lapalap nanleng oh ketidihdo sampah pwe e men peikiong kupwuren Seme. Ni e wia-aramasala, e kin papah aramas akan ni limpoak oh e pil tounmeteikihla moure pwe aramas akan en maiauda sang dihp oh mehla. (Madiu 20:28) Mahsen en Koht kin kangoange kitail: “Kumwail uhdahn pahn ahnekihla soangen lamalamohte me Krais Sises ketin sapwellimanki.” Iaduwen kitail kak kahlemengih lamalam en tounmetei me Sises sapwellimanki?—Pilipai 2:5-8.
2. Soangen kahpwal dahieu me Kristian tohto kin ahneki, oh dahme kin sewese irail?
2 Ni Ahnsou me Kitail Kin Pwang: Mendahki Sises me unsek, e pil kin kak pwang ekei pak. Ehu ahnsou, mendahki Sises “ngirekilahr eh ketin sapasapal kohla,” e kalohk ong lihen Sameria. (Sohn 4:6) Kristian tohto pil kin lelohng soangen irairohte. Mwurin ahmw doadoahk wihko pwon, ke kak pwang, oh e pahn apwal en rapahkihda ahmw kehl en kalohk ni imwin wihko. Ahpw, ma ke pahn kaukaule iang kalohk ni imwin wihk, ke pahn diarada me iang kalohk pahn kakehleiuk ni pali ngehn.—Sohn 4:32-34.
3. Iaduwen kitail kak kahlemengih sapwellimen Sises lamalam en perenki kalohk oh padahk ong aramas akan?
3 Ehu ahnsou, Sises oh sapwellime tohnpadahk ko tepida kohla wasakis pwehn kalapwukala mahs oh kommoal. Ahpw, ni ahnsou me pokon en aramas kilangirailda ni arail mweselo oh esehda, irail eri sapallahng wasao oh lel wasao mwohrail. Sises sohte lingeringer pahrail, ahpw e “kupwurohkinirailla” oh “tapiada kawehwehiong irail soahng tohto.” (Mark 6:30-34) Ni ahnsou me kitail kin onop Paipel rehn aramas, kitail en ahneki soangen lamalamohte. Kitail anahne wia uwen atail kak koaros en sewese irail oh kitail pil anahne ahneki limpoak mehlel ong aramas akan. Ma ke saikinte onop Paipel rehn aramas emen, ken dehr mworusala—nantihong rapahki ihs me ke kak tepida onop Paipel reh.
4. Iaduwen doadoahk en Auxiliary Pioneer kak sewese kitail en kahlemengih lamalam me Krais kin ketin sapwellimaniki?
4 Kihong Soahng Ngenin kan en Keieu Nan Ahmw Mour: Iang doadoahk en Auxiliary Pioneer kak sewese kitail en kihong soahng ngenin kan en keieu nan atail mour. Emen sister pwulopwul ntingihdi: “Ahn kompoakepahi ah nohno kangoange kiht en iang ih Auxiliary Pioneer erein sounpwong ehu. I inenen perenki me se iang ih. I perenki karanih brother oh sister teikan, oh irail duwehla uhdahn ahi peneinei. I pil perenki me I kalaudehla ahi ahnsou en koasoiong meteikan duwen Siohwa oh padahkiong irail duwen padahk mehlel kan me pid duwen Wehin Koht. Mehpwukat koaros sewese ie en karanih Siohwa oh sapwellime pwihn.”—Melkahka 34:8.
5. Dahme kahrehda kitail anahne wia uwen atail kak koaros en kahlemengih lamalam me Sises kin ketin sapwellimaniki?
5 Kitail koaros kin lelohng kahpwal pwehki atail sou-unsek kan kin uhwong atail ineng en kaperenda Siohwa. (Rom 7:21-23) Kitail anahne pelianda ngenin sampah me kin roporop. (Madiu 16:22, 23) Siohwa kak sewese kitail en wia met ni E kin doadoahngki sapwellime ngehn sarawi. (Kalesia 5:16, 17) Ni atail kin awiawih oh kasikasik atail pitsang koasoandi suwed wet oh pidelong nan sapwellimen Koht koasoandi kapw, kitail en kahlemengih lamalam me Sises kin ketin sapwellimaniki ni atail pahn kihong soahng kan me pid Wehio oh nsenohki meteikan oh mepwukat en kesempwal sang pein nsenatail.—Madiu 6:33; Rom 15:1-3.