Kasalehda Ngenin Pioneer
1. Iaduwen ahmw pahn kawehwe duwen wehwehn ngenin pioneer?
1 Sohte lipilipil ma ke wia emen pioneer de soh, sounkalohk koaros kak kasalehda ngenin pioneer. Sounkalohk koaros kin kesempwaliki kehkehlik me kohwong irail en kalohk oh katohnpadahk. (Madiu 28:19, 20; Wiewia 18:5) Irail kin nsenohki aramas oh kin wia tounmetei kan pwe arail doadoahk en kalohk en kak pweida mwahu. (Madiu 9:36; Wiewia 20:24) Sapwellimen Siohwa ladu kan kin wia uwen arail kak en sewese meteikan en sukuhliki padahk mehlel. (1 Kor. 9:19-23) Kitail en tehk mwahu duwen mehn kahlemeng mwahu en emen me ahneki ngenin pioneer: iei Pilip me wia sounkalohk men.
2. Iaduwen elder kan oh ministerial servant kan kin kahlemengih mehn kahlemeng mwahu en Pilip ni e kin ngoangki kalohk?
2 Kalohk oh Padahk: Pilip kin ahneki pwukoa toutou kan nan mwomwohdiso ni keieun senturi. (Wiewia 6:1-6) Ahpw, ni ahnsowohte, e kesempwaliki ah doadoahk en kalohki Rongamwahu oh e kin ngoangki wia doadoahk wet. (Wiewia 8:40) Duwehte rahnwet, elder kan oh ministerial servant kan kin wia arail pwukoa kan me kohwong irail, ahpw irail kin kasalehda ngenin pioneer ni arail kin tiengala mwowe nan doadoahk en kalohk oh irail kin ngoangki wia doadoahk wet. Ia uwen met kin kakehlada tohnmwomwohdiso en pil kasalehda ngenin pioneer!—Rom 12:11.
3. Iaduwen kitail kak kasalehda ngenin pioneer ni ahnsou me kitail kin lelohng kahpwal oh kasongosong kan?
3 Mwuren Stipen mehla, kalokolok laud kahrehiong kahpwal laud en lelohng tohnpadahk kan. Ahpw, Pilip nannantihte kalohk, oh e tepida kalohk ong mehn Sameria kan. (Wiewia 8:1, 4-6, 12, 14-17) Kitail kak kahlemengih mehn kahlemeng mwahu en Pilip ni atail pahn nannanti kalohki Rongamwahu ong aramas sohte lipilipil me kitail tuhwong mendahki kahpwal akan oh kasongosong kan lelohng kitail.—Sohn 4:9.
4. Mehn kahlemeng dahieu Pilip wia nin duwen sounpadahk men?
4 En Pilip koahiek en padahkihong aramas duwen Mahsen en Koht kin sansal sang ah koasoiong ohlen Idiopia. (Wiewia 8:26-38) Kitail kak kakairada ngenin pioneer ni atail kin nantihong koahiekla doadoahngki Pwuhk Sarawi oh ‘kawehwe iren Paipel kan.’ (Wiewia 17:2, 3) Duwehte Pilip, kitail kin nannanti kalohki Rongamwahu ong aramas sohte lipilipil iawasa oh ahnsou kan me kitail kin tuhwong irail.
5. Dahme kak sewese Kristian pahpa oh nohno kan en kakairada ngenin pioneer nan neirail seri kan?
5 Peneinei oh Mwomwohdiso: E sansal me mehn kahlemeng mwahu en Pilip oh ah ngenin pioneer kin kamwekid laud nah serepein kan. (Wiewia 21:9) Duwehte rahnwet, Kristian pahpa oh nohno kan me kin mwohneki doadoahk en Wehio kin kangoange neirail seri kan en pil mwohneki doadoahk kesempwal wet. Mendahki pahpa oh nohno kan kin pwang ni imwin wihk kan, ahpw ma irail pahn ngoangki kalohk ong meteikan, met pahn kamwekid laud mohngiong en neirail seri kan.—Lepin Padahk 22:6.
6. Iaduwen kitail kak kasalehda atail kalahnganki irail me kin pioneer nan atail mwomwohdiso?
6 Pilip kin kasalehda kadek ong Pohl oh Luk, sounkalohk ngoang kei me kin doadoahk laud ni ara kin papah Siohwa. (Wiewia 21:8, 10) Iaduwen kitail kak kasalehda atail kalahnganki irail me kin ngoangki doadoahk en kalohk rahnwet? Mwein kitail kak iang pioneer kan ni menseng de mwurin souwas ni rahn kan me malaulau kin kalohk. (Pilipai 2:4) Kitail pil kak luhke irail nan imwatail pwehn werekiong irail oh kangoange irail. Sohte lipilipil soangen irair kan me kitail ahneki, kitail koaros kak nantihong kakairada ngenin pioneer.