Kitail Anahne Wauneki Sapwellimen Siohwa Kaunda
Dahme ke kin mwadang medewehda ni ahmw kin rong ahd pwukat: Kora, Dadan, oh Apiram? Uhwong! Uhwong dah? Sapwellimen Koht kaunda, me pil wehwehki sapwellimen Koht pwung en pilada ihs me pahn kaunda. Oaritik en ire kansensuwed wet kileledi nan pwuhken Nempe irelaud 16, oh pil nan artikel me oaralap koasoia “Uhpah Ni Lelepek Sapwellimen Koht Kaunda” sang Kahn Iroir en July 1, 2003 (lokaiahn wai: Watchtower en August 1, 2002: “Loyally Submit to Godly Authority”). Ke pahn diarada me e katep laud en wadek ire pwukat oh pil kilang video cassette “Respect Jehovah’s Authority.” Ke pahn kilang kahpwal me pwarada nanpwungen nein Korah pwutak kan me lelepek oh arail pahpa me uhwong kaundahn Ih me Kaunda Lahng oh Sampah. (Nempe 26:9-11) Poadoapoad mehlel wet kak kamwekid kitail en kakairada atail lelepek ong Siohwa ni unsek.
Ni ahmw pahn kilang video cassette wet, tehk mwahu mehn kadehde kan me Kora oh ienge ko me pil uhwong kaundahn Koht: irail sohte kasalehda lelepek nan ahl kesempwal weneu pwukat: (1) Iaduwen irail kasalehda me irail sohte wauneki kaundahn Koht? (2) Iaduwen irail mweidohng aklapalap, ineng en ahneki manaman pohn meteikan, oh peirin en kaluwetala irail? (3) Ia mwomwen irail kin tetehkete soh-unsek kan en irail me pilipilda sang rehn Siohwa? (4) Madamadau en kaulim dah me re kakairada? (5) Dahme kahrehong irail en sohla itarki arail pwukoa en papah? (6) Iaduwen irail mweidohng arail lelepek ong kompoakparail oh arail peneinei en laud sang arail lelepek ong Koht?
Kitail anahne medemedewe mwahu duwen mehn kasukuhl kan me pid atail kilangwohng kaundahn Koht rahnwet: (1) Ia mwomwen ahmw pahn kilangwohng pilipil en elder kan nan mwomwohdiso, oh pwekihda? (2) Iaduwen atail kak kihsang madamadau suwed kan me kin kohda rehtail? (3) Iaduwen kitail pahn kilangwohng soh-unsek en irail me pilipilda kan en apwalih kitail? (4) Dahme kitail kak wia ma ngenin kaulim kin kekeirada nan mohngiongatail? (5) Ia mwomwen atail pepehm akan ong pwukoa kan me kohwong kitail? (6) Ihs me kitail en dehr mweidohng en kauwehla atail lelepek ong Koht, oh soangen ahnsou dah kan me met pahn kak apwal ong kitail?
Mwurin tohn ahmw mwomwohdiso pahn koasoiapene duwen ire pwukat, ke soh pil ehu kilang video cassette wet? Mweidohng video wet en kalaudehla ahmw kalahnganki kahrepe kan me kitail anahne wauneki sapwellimen Siohwa kaunda!—Melkahka 18:25; 37:28.