Kitail en Kolokolete Lamalam en Karuwaru!
1 Sises wehwehki me eh ahnsou en wia kupwuren Semeo pohn sampah wet me mwotomwot. (Sohn 9:4) Ihme kahrehda, e nantihong wia doadoahk en kalohk ni karuwaru, oh e pil kasukuhlihada sapwellime tohnpadahk ko en pil wia duwehte. (Luk 4:42-44; 8:1; 10:2-4) Pai en sampah kan kin keriau nan ah mour. (Madiu 8:20) Ihme kahrehda, e kak kanekehla ah doadoahk me Siohwa ketikihong ih en wia.—Sohn 17:4.
2 Ahnsou Mwotomwotalahr: Ahnsou en kalohki Rongamwahu nan “sampah pwon” pil mwotomwotalahr. (Madiu 24:14) Kokohp en Paipel kasalehda me kitail uhdahn kerenlahngehr imwin koasoandi wet. Ni ahnsou keren, “irail kan me pohnsehse Koht oh irail kan me sohte kin peikiong Rongamwahu en Kaun Sises . . . pahn ale kadeik en mehla soutuk.” (2 Deselonika 1:6-9, NW) Rahnen kadeik pahn leledo ni ahl kapwuriamwei ieu. (Luk 21:34, 35; 1 Dese. 5:2, 3) Aramas akan anahne kasawihada me arail mour mihmi nan irair keper ieu. Atail pwukoa en sewese irail en isaneki arail ahnsou mwahu met en pwungla rehn Siohwa pwe en ketin kupwure irail.—Sepanaia 2:2, 3.
3 Kitail en Wia Uwen Atail Kak: Pwehki sapwellimen Koht ladu kan kin wehwehki me “atail ahnsou mwotomwotalahr,” irail kin mwohneki mahs doadoahk en kalohk. (1 Kor. 7:29-31; Madiu 6:33) Ekei kin tohnmeteikihla doadoahk pweimwahu kan de pil soahng teikan me pahn mwahu ong pein irail pwe irail en kak kalaudehla arail ahnsoun kalohk. (Mark 10:29, 30) Ekei kin nannanti “soupisengki doadoahk en Kauno” mendahki kasongosong kan kin lelohng irail. (1 Kor. 15:58) Sounkadehde tohto kin ngoangkihte kalohk erein sounpahr tohto. (Ipru 10:23) Siohwa kin inenen kesempwaliki meirong koaros me aramas kin wia pwehn utungada doadoahk en Wehio.—Ipru 6:10.
4 Ni atail kin mweidohng atail kaudok ong Siohwa, iangahki atail doadoahk en kalohk, en keieu nan atail mour, met kin sewese kitail en taman me Rahnen Siohwa kerendohr. E kin pere kitail en dehr pitida pahn ahn Sehdan sampah oh e kin kakehlailihala atail inou en tiahk mwahu ahnsou koaros. (2 Piter 3:11-14) Ei, ni atail pahn wia atail doadoahk en kalohk oh kolokolete lamalam en karuwaru, met pahn sewese kitail en ale komourpatail, iangahki irail me kin rong kitail.—1 Tim. 4:16.