Nantihong Kalohk!
1. Mehnia kangoang me Pohl kihda me kesempwal nan atail ahnsou?
1 “Ke en kalohkiseli mahseno, ke en nantihong koasoakoasoia duwe.” (2 Tim. 4:2) Dahme kahrehda en Pohl kangoang inenen kesempwal nan atail ahnsou? Ia duwen mahsen pwukat kak kamwakid atail mour oh mouren meteikan?
2. Dahme kahrehda kitail kin nantihong rapahki irail kan me saikinte rong rongamwahwo?
2 E Kin Pidada Mour: Aramas tohto nan sampah saikinte rong duwen rongamwahwo me kak komourirailla. (Rom 10:13-15; 1 Tim. 4:16) Tohto irail me ahneki mohngiong mehlel kin dierekda nan wasa me kalohk kin kalapw wiawi. Ma kitail pahn kalohk ni ehu rahn tohrohr de ehu ahnsou nan rahno, kitail kakete tuhwong pil emen aramas. Atail kin wia met pahn kihong kitail nsenmwakelekel oh kitail sohte pahn pwukoahki mehlahn aramas.—Wiewia 20:26.
3. Ia duwen atail kak doadoahngki mwahu atail ahnsoun kalohk?
3 Mendahki irail tepin Kristian akan kin lelohng uhwong laud, re ‘kalohkiselier arail padahk kan nan Serusalem.’ (Wiewia 5:28) Kitail pil kin koasoanehdi en kalohkiseli rongamwahu ong aramas koaros? (Wiewia 10:42) Ni ahnsoun kalohk, kitail kin doadoahngki mwahu atail ahnsou? Ma kitail kin awih meteikan ni arail kin pwurehng pwurala rehn tohnihmw akan, kitail kin isaneki ahnsowo oh koasoiong aramas akan nanial?
4. Ia duwen atail kin nantihong kalohk kin sewese kitail en mwasamwasahn?
4 Kalaudehla Atail Mwasamwasahn: Pwehki imwin koasoandi wet eh kerendohr, kitail anahne mwasamwasahn. (1 Des. 5:1-6) Ma kitail kin kaukaule koasoia duwen atail koapworopwor duwen Wehio, kitail sohte pahn kedirepwehkin kitail koasoandi en sampah wet. (Luk 21:34-36) Ni atail kin “kasikasik” rahnen Siohwa, kitail kak kalaudehla atail iang wia doadoahk en kalohk me kak doarehla mouren aramas.—2 Pit. 3:11, 12.
5. Ia duwen atail wauneki mour kin kamwakid kitail nan doadoahk en kalohk?
5 Ni atail kin nantihong kalohk, kitail kin kasalehda sapwellimen Siohwa madamadau ong mour: ‘E sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.’ (2 Pit. 3:9; Esek. 33:11) Eri, kitail en koasoanehdi en tuhwong aramas koaros me kitail kak nan atail wasahn kalohk, oh met pahn kihong Siohwa kaping.—Mel. 109:30.