Pali 5: Wia Onop en Paipel Rehn Aramas akan ni Ahl me Pahn Sewese Irail en Kekeirada Mwahu
Koasoanehdi Ia Uwen Laud en Brochure de Pwuhk me Kumwa Pahn Onop
1 Ni ahnsou me Sises kin padahk, e kin medemedewe duwen sapwellime tohnpadahk kan, oh padahk ong irail “duwen me re kin kak wehwehki.” (Mark 4:33; Sohn 16:12) Duwehte rahnwet, kitail me kin wia sounpadahk kan en Mahsen en Koht anahne koasoanehdi ia uwen laud me kitail pahn onopki rehn aramas akan erein ahnsou me kitail onop rehrail. Uwen me kitail pahn onopki pahn poahsoanda pohn koahiek en tohnsukuhlo oh pil irair en sounpadahko oh pil tohnsukuhlo.
2 Kakairada Pwoson Kehlail: Ekei tohnsukuhl mwein pahn anahne kasukuhl pak tohto sang pak riau de siluh pwehn koledi dahme tohnsukuhl teikan alehier nan kasukuhl ehute. E kesempwal kitail en sewese tohnsukuhlo en wehwehki dahme e onopki sang atail mwadang wia onopo ahpw tohnsukuhlo sohte wehwehki dahme e onopki. Tohnsukuhl koaros anahne wehwehki mwahu padahk kan en Mahsen en Koht pwehn kak ahneki pwoson kehlail.—Lepin Padahk 4:7; Rom 12:2.
3 Ni ahmw pahn onop rehn tohnsukuhlo wihk koaros, pil kihong ahmw ahnsou me anahn pwehn sewese ih en wehwehki oh kamehlele padahk kan me kohsang nan Mahsen en Koht. Dehr karuwaru onop pweh tohnsukuhlo anahne paiekihda padahk mehlel me e sukuhliki. Mweidong ahnsou me itar en kasalehda ire kesempwal kan oh iren Paipel kan me pahn utungada padahk kan.—2 Tim. 3:16, 17.
4 Doudoulahte Nan Onopo: Kitail sohte men karuwaru ni ahnsoun onop oh pil kitail sohte men mweidohng mehkot en kauwehla atail onopki brochure de pwuhko. Ma tohnsukuhlo kin perenki koasoakoasoia soahng kan me pid pein ih, kitail anahne koasoanehdi en koasoia soahng pwukat mwurin onopo.—Ekl. 3:1.
5 Ni pali teio, kitail anahne kanahieng me pein kitail sohte pahn koasoakoasoi nohn daulihla pwehki kitail kin medemedewe uwen atail kin ngoangki padahk mehlel. (Mel. 145:6, 7) Ekei pak, kitail kak koasoia duwen ekspiriens ehu de ehu ire tohrohr me pahn sewese tohnsukuhlo en wehwehki duwen onopo, ahpw kitail sohte men koasoakoasoi nohn daulihla pwehki met pahn kauwehla en tohnsukuhlo ahnsou en sukuhliki loalokong pwung en padahk kan sang Paipel.
6 Ni atail pahn kawehwe dahme kitail onopki ni uwe ieu me itar nan ehu ehu onop, kitail kak sewese tohnsukuhl akan en “keid nan marain me Siohwa ketikihong kitail.”—Aiseia 2:5, New World Translation.