Prokram Kapw en Kapokon en Circuit
Nan imwin rahn pwukat, e kesempwal kitail en likoukihda irair kan en Kristian mehlel oh kolokol kanahieng kilelepen Kristian mehlel. (Kaudiahl 16:15) Kahrehda, e konehng oaralap en Kapokon en Circuit en pahr en kalohk en 2006 iei “Kumwail Pwuhriong nan Likoun Mour Kapw.”—Kolose 3:10.
Keieun Rahn: Oaralap en keieun symposium iei “Kasalehda Irair akan en Mour Kapw” oh padahk pwukat pahn kasalehda iaduwen pwuhriong nan likoun mour kapw kak sewese kitail nan atail mour pwon. Iaduwen kitail kak pwuhriong nan likoun mour kapw? Peidek wet pahn pasapengla nan kaimwiseklahn padahk riau me oaralap koasoia, “Kaiahne Pein Komwi en Doudouloale ni Ahl me Konehng” oh “Kasukuhl me Kin Sewese Kitail en Pwuhriong Nan Likoun Mour Kapw.”
Keriaun Rahn: Keriaun symposium pahn kasalehda iaduwen atail pwuhriong nan likoun mour kapw ah pahn pidada atail doadoahngki lowatail ni ahl me mwahu oh oaralap en keriaun symposium koasoia, “Kekeirada Atail Doadoahngki Lokaiahn me Loalokong kan.” Oaralap en Kapahrek ong Wehi Pokon koasoia “Ke Kin Powehdi Kasongosong kan me Kohsang Rehn Me Suwedo?” oh padahk wet kin kasalehda duwen anahnepen atail masamasahn oh tehk widing en Sehdan kan pwe irail dehr powehkitaildi. Oaralap en kaimwiseklahn padahk riau en kapokono koasoia: “Dehr Saminkihla Tiahk Suwed en Sampah Wet” oh “Kakehlailih Atail Pali Ngehn Rahn Koaros,” oh padahk riau pwukat pahn sewese kitail en dehr ahneki soangen madamadau kan oh wiewia kan me kin uhwong sapwellimen Koht ahl pwung kan oh pil duwen kitail en nantihong papah Siohwa.
Kitail kin kasikasik kangoang me kitail pahn ale sang prokram en kapokon pwe kitail en pwuhriong nan likoun mour kapw en aramas kapw!