Dahme Kin Pweida Pwehki Atail Doadoahk en Kalohk
1. Iaduwen Siohwa kin kilangwohng atail doadoahk en kalohk, oh iaduwen—aramas koaros kin perenki rong?
1 Mahsen en Koht kin karasaiong Kristian akan me kin perenki wia doadoahk en Siohwa duwehte kapar en powehdi. (2 Kor. 2:14-16) Ni atail kin ehukihong meteikan duwen loalokong me pid duwen Koht, atail kalohk kin duwehte warpwohmwahu ong Siohwa. Ekei aramas kin perenki rong Rongamwahu en Wehin Koht; ahpw, ekei aramas sohte kin perenki rong. Ahpw, mendahki pali laud en aramas sohte perenki rong, met sohte wehwehki me atail doadoahk en kalohk sohte pweida. Kitail en tehk kanahieng dahme kin pweida pwehki atail doadoahk en kalohk.
2. Dahme atail wia doadoahk en kalohk kin kasalehda?
2 Kapinga Siohwa: Sehdan kin nda me aramas akan kin papah Siohwa pwehki kapai kan me irail kin ale sang reh. (Sohp 1:9-11) Ahpw, atail doadoahk en kalohk kin kasalehda me atail limpoak oh lelepek ong Siohwa me mehlel. Sounkalohk tohto kin peikiong kehkehlik en kalohk oh katohnpadahk mendahki arail irair en mour kin apwal de aramas sohte kin perenki rong. Soangen lelepek oh dadaur mendahki kahpwal kin kaperenda mohngiong en Siohwa!—Lepin Padahk 27:11.
3. Dahme kahrehda e kesempwal en kalohki mwaren Koht oh kupwure?
3 Oh pil, atail doadoahk en kalohk kin wia kisehn kalaudpen me kupwuren Koht kin pweida laud. Me wia kisehn kasohrala me pahn wiawi ohng ahn Sehdan sampah suwed wet pahn imwisekla, oh Siohwa mahsanih: “Wehi kan ahpw pahn esehla me ngehi, Siohwa, me Koht mehlel.” (Esekiel 39:7) Pwe tohnwehi kan koaros en esehla Siohwa, e kesempwal sapwellimen Siohwa ladu kan en kalohki mware oh kupwure ong “tohn wehi koaros, kadaudok koaros, lokaia koaros, oh sahpw koaros.”—Kaudiahl 14:6, 7.
4. Iaduwen doadoahk en kalohk kin wia poahsoanpen kadeik?
4 Poahsoanpen Kadeik: Doadoahk en kalohki Rongamwahu en Wehin Koht pahn pil wia poahsoanpen kadeik. Wahnpoaron Pohl kasalehda me Sises Krais pahn kadeikada “irail kan me pohnsehse Koht oh irail kan me sohte kin peikiong Rongamwahu en Kaun Sises.” (2 Deselonika 1:8, 9) Aramas akan pahn ale kadeikparail sang ni mwomwen arail pahn rong oh mwekidki Rongamwahu. E sansal mwahu me sapwellimen Koht ladu kan kin ahneki pwukoa toutou ehu! Pwe kitail en dehr pwukoahki mour en aramas teikan, kitail en wia uwen atail kak en kalohki Rongamwahu en Wehin Koht.—Wiewia 20:26, 27.
5. Iaduwen Siohwa kin kasalehda sapwellime limpoak oh kadek nan atail doadoahk en kalohk?
5 Siohwa kin kasalehda sapwellime limpoak oh kadek ong aramas akan ni e kin doadoahngki kitail en nantihong sewese aramas en kenikenla reh. (1 Tim. 2:3, 4) Kitail wehwehki me mour en aramas kin wekiwekila ahnsou koaros, kahrehda kitail men pwurepwurehng pwurala rehrail oh kangoange irail en rapahki Siohwa ahnsouwet, pwe miehte ahnsou luhwe nan koasoandi suwed wet en wia met. Ni atail pahn wiewia met, kitail pahn kasalehda me kitail kahlemengih “sapwellimen Koht irair en kadek,” me “sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.”—Luk 1:78; 2 Pit. 3:9.
6. Iaduwen pein kitail kin paiekihda atail soupisengki papah Siohwa?
6 Pein Kitail Kin Paiekihda: Atail soupisengki doadoahk en Siohwa kin wia perepatail. E pil kin sewese kitail en “kasikasik sapwellimen Koht Rahno” oh en dehr saminkihla wiewia oh ineng suwed en sampah wet. (2 Pit. 3:11-14; Taitus 2:11, 12) Kahrehda, kitail en “kehlail oh dadaur oh loalenohng atail doadoahk ong Kauno ahnsou koaros,” pwe kitail wehwehki me atail nannanti nan doadoahk en kalohk kin katapan.—1 Kor. 15:58.