Wiahda Ahl ong Kalohki Rongamwahu
1 Mwomwohdiso kan kin wiawihkihda soangsoangen aramas me kin ahneki soangsoangen irair en mour. Ahpw, kitail koaros kin miniminkihpene atail kin nantihong en kapinga Siohwa. (Melkahka 79:13) Ma kitail sohte ahneki roson mwahu de irair akan me kitail mihmi loale kin apwal ong kalohki Rongamwahu, iaduwen atail kak wiahda ahl pwehn kak kalohkihong meteikan Rongamwahu?
2 Wiewia kan en Ehuehu Rahn: Sises isaneki sapwellime ahnsou mwahu kan koaros pwehn kalohk ong aramas akan. E kalohk ong Madiu ni ahnsou me e ketiketseli nan wasa me ah ohpis en daksis mih ie, oh e pil kalohk ong Sakies ni ahnsou me e seiseiloak, oh e pil kalohk ong lihen Sameria men ni ahnsou me e komkommoal. (Madiu 9:9; Luk 19:1-5; Sohn 4:6-10) Pil duwehte kitail, kitail kak doadoahngki atail ahnsou ni atail kin tuhwong aramas ehuehu rahn pwehn kalohk ong irail. Ma kitail pahn kin weuwa neitail Paipel iangahki ekei tract oh ekei brochure kan, met pil pahn sewese kitail en kalohkihong aramas duwen atail koapworopwor.—1 Piter 3:15.
3 Ke kin apwal en iang kalohk ihmw-lel-ihmw pwehki e apwal ong uhk en kohseli? Nantihong kalohk ong irail toahkte de tohndoadoahk en imwen wini me ke kin tuhwong. (Wiewia 28:30, 31) Ma ke sohte kin kohseli pwehki ke anahne mihmi nan ihmw, ke kin kalohk ni ahmw doadoahngki telephone de nting kisinlikou? Emen sister kin kaukaule nting ohng tohn ah peneinei me kaidehn Sounkadehde. E kin kasalehda duwen iren Paipel kan me kin kangoange ih oh pil ekspiriens en ah kalohk.
4 Nan Wasahn Doadoahk de Wasahn Sukuhl: Atail ineng en men kaping Siohwa pahn sewese kitail en wiahda elen kalohk nan wasahn doadoahk de wasahn sukuhl. Emen sounkalohk me sounpahr waluh ehukihong ienge tohnsukuhl akan duwen dahme e sukuhliki sang nan Awake! makisihn duwen maram. Ni ahnsou me ah sounpadahk rongada me e kin kihsang nan Awake! makisihn duwen soahng kan me e koasoiahki duwen maram, eri sounpadahko tepida ale Watchtower oh Awake! makisihn ahnsou koaros. Nan atail wasahn doadoahk, e pahn mwahu en kihdi pwuhken Loalokong de pwuhken Mour Kohkohlahte wasakis me aramas pahn kak kilang, oh met pahn kak kahrehiong irail en peidek oh kowe eri kak kalohk ong irail.
5 Ke kak wiahda ahl pwe ken kak kalohk rahn koaros? Ni atail kin kasawih pein atail irair kan, kitail kak nantihong “wiahiong Koht atail tungoal meirong en kaping” ehuehu rahn.—Ipru 13:15.