Isaneki Omw Ahnsou Mwahu Koaros en Kihpeseng Rohng en Wehio!

1. Mehn kasukuhl dah me kitail kak sukuhlkihsang en Depit mehn kahlemeng?

1 Nanmwarki Depit iei emen me sohte mweidohng eh irair kan en kaluwetehla ih. Karasepe, Depit men kauwada tehnpas en Siohwa. Ni Siohwa eh mahsaniong en dehr wia met, Depit wekidala eh koasoandi kan oh sawas kihpene soahng kan ong Solomon pwehn kauwada tehnpaso. (1 Nan. 8:17-19; 1 Kron. 29:3-9) Depit sohte kin medemedewe soahng kan me e sohte kak wia, ahpw e kin medemedewehte dahme e kak wia. Ia duwen atail kak alasang en Depit mehn kahlemeng ni atail kin rapahki ahl akan en kihpeseng rohng en Wehio?

2. Dahme kitail kak tehk duwen pein kitail?

² Wia Dahme Ke Kak Wia: Me tohto kin kihsang soahng kan me sohte nohn kesempwal nan arail mour pwehn iang sawaspen pioneer de pioneer. (1 Tim. 6:8) Ke kak iang irail? Ni omw kin kapakapki oh tehk mwahu omw irair kan, ele ke pahn kilang me “wenihmw laud ehu me pahn kahluwalahng doadoahk” langada ong uhk. Ma iei, isaneki ahnsou mwahu koaros!​—1 Kor. 16:8, 9, NW.

3. Soangen ahnsou mwahu dah kan me kitail kak isaneki mehnda ma atail irair kan sohte mweidohng kitail en pioneer?

³ Ia duwen ma omw irair kan sohte mweidohng uhk en pioneer? Dehr pohnsehsehla ekei soahng mwahu teikan me ke kak wia. Karasepe, ma omw doadoahk en mwohni kin kahrehiong uhk en tuhwong emen me sohte mi nan padahk mehlel, ke seu isaneki ahnsou mwahu en kalohk ong ih? De ma ke kin ahneki kahpwal en roson, ke kak isaneki ahnsou mwahu en kalohk ong irail me kin apwalih omw roson? Tamataman me mie soangen koasoandi ong irail kan me arail irair uhdahn apwal en ripohtki minit 15 pwehki arail sounpar de kahpwal laud en roson. Ni omw kin audehda noumw ripoht en kalohk en ehuehu sounpwong, tehk pwe ken kapatahiong awahn kalohk ni ahnsou sohte lipilipil oh pil sawaspen Paipel kan me ke kihla, iangahki kisin doaropwe kan oh doaropwehn luhk ong Kataman oh mihting tohrohr kan. Ke pahn pwuriamweikihla uwen mwadang en ahnsou tikitik pwukat ar kin wiahda ahnsou laud ni ar kin kapatapatpene!

4. Dahme ke koasoanehdi teng ken wia?

⁴ Sohte lipilipil soangen irair dah kan me emenemen kitail ahneki, kitail en isaneki ahnsou mwahu koaros en kihpeseng rongamwahwo. Eri kitail pahn kak nsenamwahuki atail ese me kitail kin wia uwen atail kak koaros ong Wehio.​—Mark 14:8; Luk 21:2-4.