Kihseli Makisihn Tohrohr en Awake! nan September
1Pali laud en aramas kin perenki ngilen menpihr kan me kin kokoul oh aramas pil kin perenki kilang kihrlahn ketipin. Ahpw, aramas tohto kin pohnsehse me mie Sahm limpoak men me kapikada soahng pwukat. Kitail pahn ale pwukoah tohrohr en kadehde duwen Siohwa me e ketin wia Sounkapikada sang ni kohpeseng en makisihn en Awake! tohrohr wet. Makisihn wet ohng sounpwong en September kin koasoiahte duwen ire wet “Mie Sounkapikada?”
2 Nan Wasahn Kalohk: Ma kak, wiahda koasoandi en iang tohnmwomwohdiso wia doadoahk en ihmw-lel-ihmw Rahn Kaunop koaros. Ke kak pil kihseli makisihn wet ni ahnsou sohte lipilipil nan wihk en kihseli makisihn wet. Sounpadahk kan oh meteikan me kin iang doadoahk nan wasa kan me kin pid kasukuhl pahn perenki makisihn wet. Ihme kahrehda, koasoandi tohrohr kan kak wiawihda pwehn kohla tuhwong irail pwukat nan ahmw wasahn kalohk.
3 Ma aramaso kasalehda me e perenki, eri, kihong ih ehu peidek me ke pahn kak pwurala reh oh koasoia. Karasepe, ke kak kihda ehu peidek duwen dahme kahrehda Sounkapikada limpoak men kak mweidala lokolok laud en wiawi. Eri, ni omw pahn pwurala, ke kak koasoia irelaud 8 nan pwuhken Loalokong. De mwein ke kak kihda peidek me pid duwen kupwuren Sounkapikadao ohng sampah oh ke kak tehk irelaud 1 ni ahmw pahn pwurala.
4 Ni Imwen Sukuhl: Ma ke kin ieiangete sukuhl, ke sou kihong Awake! tohrohr wet nin duwen kisakis ohng ahmw sounpadahk oh iengomw tohnsukuhl kan? Pil sangete ni ahmw pahn kihdi ehu makisihn pohn ahmw tehpel en nting pahn kahrehda meteikan en peidengki dahme kitail kin kamehlele. Ke pahn kak doadoahngki makisihn wet pwehn kak kawehwe dahme ke kin kamehlele de ahmw pwoson ni koaskoasoipene en tohnsukuhl kan nan perehn sukuhl de nan ripoht kan me ke anahne wiahda nan sukuhl. Pwehn sewese iuk, makisihn wet kin pil pid duwen “Peidek kan en me Pwulopwul” nan artikel kan me oaralap koasoia “Iaduwen ahi kak kadehde ahi pwoson sang ni kepikipik kan?”
5 Siohwa warohng wahu oh kaping ohng mehkan me e kapikada. (Kaudiahl 4:11) Kitail kak kawauwihala atail Sounkapikada oh sewese meteikan en wia met sang ni atail pahn ngoangki kihseli Awake! makisihn nan sounpwong en September.