Makasihn Tohrohr en Awake! me Kitail Pahn Kihla nan November!
1 Aramas tohto kin ahneki peidek mwahu kan me pid duwen kesempwalpen Paipel. Karasepe, ma aramas akan me ntingihdi Paipel, iaduwen e kak adaneki Mahsen en Koht? Dahme kahrehda I anahne likih Paipel en kahre ei mour? Ia kamwahupen ei kin doadoahngki ei ahnsou ong wadek oh onop Paipel? Mehnia kawehwehpen Paipel me I pahn doadoahngki? Makasihn tohrohr en Awake! en November, oaralap mahsanih “Ke Kak Likih Paipel?” pahn sapeng soangen peidek pwukat.
2 Kitail men kihla makasihn tohrohr en Awake! tohto nan atail wasahn kalohk. Ma ke kak, iang koasoandi en mwomwohdiso ong kalohk en ihmw lel ihmw ni Rahn Kaunop koaros nan sounpwong en November. Kasalehda makasihn en Awake! wet ong ahmw peneinei, mehn mpomw kan, iengomw tohndoadoahk kan, sounpadahk kan, iengomw tohnsukuhl kan, oh tohnihmw kan me ke kin kaukaule pwurala reh. Wahda makasihn kan ni ahnsou me ke pahn kohla netinet oh seiloak. Elder kan oahte makasihn tohto pwe pahn mie makasihn kan me itar en kihla nan mwomwohdiso.
3 Tepiada Onop en Paipel: Ma ke kihla makasihn, ke kak kaunopada en tepiada onop en Paipel mwohn ke pahn kaimwisekala ahmw koasoi. Karasepe, ke kak nda, “Ni ahnsou me I pahn pwurodo, I men kasalehong komwi sang nan Paipel pasapengpen peidek wet, ‘Ia kupwuren Koht ong sampah?’” Oh pwurala rehn tohnihmwo oh kasalehong ih pali 4-5 en pwuhken Loalokong. Mwurin mwo, kamwomwada onop en Paipel ni ahmw pahn doadoahngki tepin parakrap kan en irelaud 1. Ke pil kak nda, “Ni ahnsou me I pahn pwurodo, I men koasoiaiong komwi duwen kokohp en Paipel me kin pweipweida ni ahnsouwet.” Ni ahnsou me ke pahn pwurala rehn tohnihmwo, kasalehong ih irelaud 11 en pwuhko oh koasoipene duwen parakrap 1-4. De mwein ke pil pahn kak ndaiong tohnihmwo: “Aramas tohto kin apwaliki wehwehki dahme re kin wadek nan Paipel. Ni ahnsou me I pahn pwurodo, I men kasalehong komwi iaduwen ke kak wehwehki mwahu noumw Paipel.” Ni ahnsou me ke pahn pwurala reh, doadoahngki pwuhken Loalokong, oh kamwomwada onop en Paipel.
4 Paipel kelepw kak kihong kitail ‘erpit me kak kahluwakitaillahng nan mour soutuk.’ (2 Timoty 3:15) Kahrehda, kitail koaros men ngoangki kihla makasihn tohrohr en Awake! wet pwehn sewese aramas akan en kalaudehla arail likih Paipel!