“Iaduwen Ke Pahn Sapeng?”
1. Soangen apwal dahieu me pali tohto en kitail kin lelong?
1 Ke kin poakohng Mahsen en Koht ahpw diarada me e apwal en tamanda soahng koaros me wiawi nan ekei koasoi kan en Paipel de mehnia iren Paipel me lepin mahsen me ekis apwal ken kileledi ie? Ke men noumw seri kan en wehwehki pwung ire mehlel kan de padahk kan en Paipel? Nan Awake!, me kin wiawihda nan sounpwong koaros, pali 31, mie wasa tohrohr ehu me koasoia “How Would You Answer? (Iaduwen Ke Pahn Sapeng?)” me kak sewese irail me pwulopwul oh me mah kan en kalaudehla arail esehla Paipel.—Wiewia 17:11.
2. Iaduwen ke kak doadoahngki ehuehu wasa nan pali tohrohr wet “How Would You Answer? (Iaduwen Ke Pahn Sapeng?)”?
2 Iaduwen ke kak kadoadoahki pali tohrohr wet ni ahl me keieu mwahu? Awake! en January 2006 kihda mehn sawas kei: “Kihong ahnsou en tehk pali 31 . . . Ekei wasa nan pali wet pahn kaperen ohng tohn wadawad pwulopwul kan; oh ekei wasa pahn mwomwen pelian kapeidekih madamadau en irail kan me dohla nan arail onopki Paipel. Wasa me nda ‘When in History? (Iahd nan Poadoapoad?)’ pahn sewese emen en mwomwen wiahda lain ehu de kaireklahn ahnsou kan me pahn kasalehda iahd aramas en Paipel kan kin wie momour de iahd me mwekid laud ehu wiawihda. Mendahki pasapeng kan en ‘From This Issue (Sang nan Makasihn Wet)’ pahn dierek wasa kan nan makasihn wet, pasapengpen peidek tohto teikan pahn pwarada nan ehu pali tohrohr me pilipildahier, nan wasa me nting kan pahn uhd wekidekdih. Dahme ke sou wiahda pein ahmw research mwohn ahmw pahn wadek pasapeng pwukat oh ehukihong meteikan dahme ke sukuhlkiher? Ke kakete doadoahngki ehuehu wasa nan pali tohrohr wet, ‘How Would You Answer? (Iaduwen Ke Pahn Sapeng?)’ en wia mouren de poahsoanpen ahmw onop en peneinei de pwihn.”
3. Ia kamwahu kan me ekei peneinei paiekidahr sang nan pali tohrohr wet, oh mehnia me ke keieu perenki?
3 Mehlel, peneinei tohto kin mwahuki doadoahngki pali tohrohr wet en wia mouren arail onop en peneinei. Emen nohno ntingihdi: “Ngehi oh ahi pwoud medewe me e mwahu en kapatahiong ‘Children’s Picture Search (Kilel kan me Seri kan en Rapahki)’ nan aht onop en peneinei pwehn kak kahrehong nait serepein me sounpar siluh en perenki aht onop. E uhdahn kaperen en kilang ih en ale pein nah makasihn en Awake! oh kin mwadangete pahkseli pali koaros lao eh diarada dahme e raparapahki.” Emen pahpa sang Brazil koasoia: “Ngehi oh nei pwutak me sounpar isuh inenen perenki wasa tohrohr wet nan Awake! E uhdahn sewese Moises en rong kanahieng, rapahkihda iren Paipel kan, esehla wehwehn kilel kan, oh wehwehkihla duwen ahnsou kan nan Paipel.” Ashley, sounpar waluh, ntingihdi: “Kalahnganki ‘How Would You Answer? (Iaduwen Ke Pahn Sapeng?)’ me mih ni imwin Awake! I sukuhlikier soahng tohto duwen Paipel sang wasaht.”
4. Ia duwen peneinei ehu kak doadoahngki pali tohrohr wet nin duwen ehu mehn sawas ong arail onop en Paipel en peneinei?
4 Ekei pak, dahme ke sou doadoahngki “How Would You Answer? (Iaduwen Ke Pahn Sapeng?)” nan amwail onop en peneinei? Ke kak doadoahngki Index de Watchtower Library nan CD-ROM en rapahki pasapeng ohng ekei peidek me nohn apwal. Sang ni ahmw wia met, ke pahn kasukuhliong noumw seri kan en wia pein arail research kan. A ma mie noumw seri me ekis laud, kihong irail ekei peidek kan me apwal pwe irail en wia research oh rapahki pasapengpe, duwehte wasa me nda, “Who Am I? (Ihs Ngehi?)” de “When in History? (Iahd nan Poadoapoad?)” mwohn amwail wia onop en peneinei? Ni ahnsou irail wia onop en peneinei, irail kak ehukihong koaros wahn arail research kan. Doadoahngki pali wet en pweida mwahu iei ehu ahl me pahpa oh nohno kan kak padahkiong neirail seri kan Mahsen en Koht, sewese irail en esehla “Pwuhk Sarawi” sang ni arail seri pwelel.—2 Timoty 3:15; Deuderonomi 6:7.