Kihong me Semwehmwe Koapworopwor
1 Sises kin ketin kasalehda eh nsenohki mehlel irail me semwehmwe kan. Mie ahnsou me e ketin wiahda manaman pwehn ketikihda sawas en kepwe kan oh kamwahuiala me soumwahu kan, ahpw e kin ketin keieu kesempwaliki kalohki “Rongamwahu” ong me semwehmwe kan. (Madiu 11:5) Doadoahk en kalohk en Kristian me kin wiawi ni atail ahnsou pil kin wia kamwahu ong me semwehmwe kan oh pil meteikan.—Madiu 24:14; 28:19, 20.
2 Koapworopwor Mehlel: Kaunen pelien lamalam en pwihn kan me dene irail Kristian kin kalapw inoukihong me semwehmwe kan me re pahn kepwehpwehla ma re pahn kihda sawas laud ong arail sarawi. Ahpw, Paipel kin padahngki me Wehin Koht kelepw pahn kaimwisekla kahpwal en semwehmwe oh kamwahuiala kahpwal koaros me tohnsampah kin lelong. (Melkahka 9:18; 145:16; Aiseia 65:21-23) Sang ni atail kin kasalehong me semwehmwe kan dahme Paipel kin uhdahn padahngki, kitail kin kihong irail koapworopwor, oh kin sewese irail en kaitarala arail anahn en esehla oh kaudokiong Koht.—Madiu 5:3.
3 Irail Parisi ko nan ahnsoun Sises kin mwamwahleki me semwehmwe kan oh likwerikin irail ‘am-ha·’aʹrets, de “aramas en pwehl.” Ahpw, Sises kin ketin “kesempwalki ar mour.” (Melkahka 72:13, 14) Kitail kak kahlemengih Sises oh ‘kadek ong’ me semwehmwe kan sang ni atail kin kasalehda me kitail kin nsenohki irail oh arail kahpwal kan. (Lepin Padahk 14:31) Kitail sohte men mwamwahleki me semwehmwe kan sang ni atail lokaia kan de pil sohte men kasalehda me kitail sohte perenki kalohk ong irail. Me tohto me kin mwekidki rongamwahu en Wehio iei irail me semwehmwe kan.
4 Sewese me Semwehmwe kan ni Ahnsouwet: En padahkiong me semwehmwe kan nan wasahn kalohk mouren kaweid en Paipel kan pil kin sewese irail en katikitikla arail kahpwal kan ni ahnsouwet. Karasepe, Paipel kin padahngki en dehr kamam sakau oh wia pilein mwohni oh dangahnga oh simoak sika oh wiewia teikan me kak kahrehda semwehmwe. (Lepin Padahk 6:10, 11; 23:21; 2 Korint 7:1; Episos 5:5) Iren Paipel kan kin kangoange irail en mehlel oh “loalenohng” ni ahnsoun doadoahk, oh kaunen wasahn doadoahk kan kin kesempwalki soangen irair pwukat. (Kolose 3:22, 23; Ipru 13:18) Ni mehlel, ehu roporop kin kasalehda me pali laud en kaunen wasahn doadoahk kan kin keieu kesempwalki irair en mehlel oh lelepek ni ahnsou me re kin medemedewe ihs me re pahn ale ong arail wasahn doadoahk.
5 Siohwa kin ketin nsenohki kahpwal kan me semwehmwe kan kin lelong. Ni ahnsou keren, Sises Krais pahn kapitala “me semwehmwe kan me kin likweriong.” (Melkahka 72:12) Lao lel ahnsowo, mie atail pwais en kamweit meteikan me iangahkihte me semwehmwe kan ki koapworopwor me kohsang nan Paipel.