Kitail Anahne Kolokol Atail Ngoang nan Atail Doadoahk en Kalohk
1 Sangehr nan pahr 1992 kohdo, Sounkadehdehn Siohwa kan kin toukihda awa lik lik kei ong doadoahk en kalohk oh katohnpadahk nan sampah pwon. Ia uwen atail peren mehnda ma kitail iang ekiste pidada pweidahn doadoahk wet!—Mad. 28:19, 20.
2 Ei, kaping oh kalahngan koaros pahn kohwong Siohwa, me apwalih atail kalohk ni “imwin rahn akan.” (2 Tim. 3:1) Dahme kitail anahne wia ma kitail men pousehlahte kolokol ngoang nan doadoahk kesempwal wet?
3 Utupen Ngoang: Atail limpoak mehlel ong Koht oh mehn mpatail kan, iangahki ineng en kolokol atail inou pahn kakehle kitail nan doadoahk en Wehio. (Mad. 22:37-39; 1 Sohn 5:3) Limpoak kin kamwakid kitail en wiahda soangen tounmetei kan koaros me anahn pwehn iang wia doadoahk en kalohk ni uwen me kitail kakohng.—Luk 9:23.
4 Nantihong Pwe Ken Kolokolete Ahmw Ngoang: Atail imwintihti Tepil kin wia uwen eh kak koaros pwehn kaluwetala atail ngoang nan doadoahk en kalohk. Ahn aramas akan kahng rong, mehn kerempwa kan en sampah wet, anahn akan en ehuehu rahn, epwelpen atail roson mwahu iei ekei soahng kan me Sehdan kin doadoahngki pwehn kaluwetala kitail.
5 Eri, ihme kahrehda kitail anahne kolokolete atail ngoang. E kesempwal kitail en kakairada soangen “limpoak en mahso.” Kitail pahn anahne wadek kaukaule oh doudouloale mahsen en Koht, iei Paipel, oh isaneki soahng koaros me Siohwa kin ketikihong kitail ki “ladu lelepek oh loalokong” pwehn kakehle atail pwoson.—Kaud. 2:4; Luk 12:42; Mel. 119:97.
6 Duwehte dahme Paipel kohpadahr ni sansal, rahnen Siohwa pahn mwadang leledo pwehn kasohrala aramas suwed akan. (2 Pit. 2:3; 3:10) Eri, kitail en tamataman met oh nantihong wia uwen atail kak koaros en ngoang nan atail doadoahk wet en kalohki Wehio oh katohnpadahk me wiawi nan sampah pwon.