“Pwerisekiong Amwail Doadoahk”
1. Dahme kitail anahne kasalehda nan atail doadoahk en kalohk?
1 Kitail en dehr kesehla atail ngoangki doadoahk en kalohk. Kangoang kowohng kitail en ‘pwerisekiong atail doadoahk’ oh ‘poadidiong papah Siohwa.’ (Rom 12:11) Ahpw mie soahng tohto me kak kaluwetala atail ngoangki kalohk. Ia duwen atail kak kalaudehla atail ngoangki doadoahk en Wehio?
2. Ia duwen pein onop Paipel oh ngoangki kalohk kin ehupene?
2 Pein Onop Paipel: Sounkalohk men me kin pweida kin poakohng sapwellimen Koht kosonnedo oh uhdahn mwekidki padahk mehlel nan kosonnedo. (Mel. 119:97) Ni ahnsou me kitail kin sukuhlki padahk mehlel en Paipel ni atail kin pein onop, e kin kamwakid atail mohngiong oh kalaudehla atail ngoang. Limpoak ong Sounketikihda padahk pwukat oh atail kin men ehukihong meteikan rongamwahu kin kamwakid kitail en kapinga Koht oh kalohki mwareo. (Ipru 13:15) E sansal me ni atail kin ngoangki kalohki rongamwahwo, e kin kasalehda atail kin uhdahn wehwehki kesempwalpen rongamwahwo.
3. Ia duwen sapwellimen Koht manaman kak sewese kitail nan doadoahk en kalohk?
3 Kapakapki Sapwellimen Koht Manaman: Kitail sohte kak koahiekla nan kalohk ma kitail kin kehliki pein kitail. Kitail kak kolokol atail ngoang ma kitail kin mweidohng sapwellimen Koht manaman en kahluwa kitail. (1 Pit. 4:11) Ma kitail pahn karanih Koht, e pahn ketikihong kitail “sapwellime manaman” me inenen kehlail pwe kitail en kak eimah kalohk. (Ais. 40:26, 29-31) Ni ahnsou me wahnpoaron Pohl lelohng kahpwal kan nan eh kalohk, “Koht ketin sewese” ih. (Wiewia 26:21, 22) Sapwellimen Siohwa manaman kak sewese kitail en pwerisekiong atail doadoahk en kalohk. Ihme kahrehda kitail anahne kapakapki sapwellime manamano.—Luk 11:9-13.
4. Kamwahu dah kan kak kohsang atail ngoang? Ahpw dahme kitail anahne kanaiehng?
4 Atail ngoangki mehlel kalohki Wehio kin kalapw kalaudehla ngoang nanpwungen iengetail Kristian akan. (2 Kor. 9:2) Nan atail wasahn kalohk, aramas kin kalapw mwekidki rongamwahwo ma kitail kin kasalehda ngoang oh ma re kilang me kitail uhdahn kamehlele rongamwahwo. Ahpw kitail pil anahne kasalehda koahiek oh kadek. (Taitus 3:2) Ahnsou koaros, kitail kin wauneki tohnihmw oh eh pwuhng en wiahda pilipil.
5. Mehnia kaweid me kitail anahne nantihong kapwaiada?
5 Nin duwen sounkalohki Wehio, kitail en ahnsou koaros ‘pwerisekiong atail doadoahk.’ Kitail en kakairada atail ngoang ni atail kin wia pein atail onop Paipel oh kapakap ni ngidingid ong Siohwa pwe e pahn kak ketikihong kitail sapwellime manaman me inenen kehlail. Ni ahl wet, kitail kak ngoangki wia atail doadoahk en kalohk pwehki sapwellimen Koht manaman oh pil ni atail “kamehlele unsek” padahk mehlelo.—1 Des. 1:5.