Pein Onop oh Onop en Peneinei Uhdahn Kesempwal!
1. Dahme Governing Body uhdahn nsenohkin kitail ahnsou wet oh pwekida?
1 Nin duwen mwehin tepin Kristian, Governing Body uhdahn kin nsenohki oh wia uwen me e kak pwehn apwalih sapwellimen Siohwa aramas akan. (Wiewia 15:6, 28) Kahn kamakam kowahlap inenen kerendohr, e uhdahn kesempwal emenemen sounkalohk en Wehio en ahneki nanpwungmwahu kehlail rehn Siohwa. Ia duwen ke pahn doadoahngki ahnsou me koasoanehdier ong Pwuhk Study en Mwomwohdiso? Kangoang kohwong koaros en doadoahngki ahnsou wet ong ahnsoun kaudok nin duwen peneinei. Doadoahngki mwahu ahnsou wet pahn kihong kitail en kalaudehla atail wehwehkihla mahsen Koht oh paiekihda sang sapwellime padahk kan.—Mel. 1:1-3; Rom 11:33, 34.
2. Ia duwen kitail kak koasoanehdi atail ahnsoun kaudok en peneinei nin soutik kan? Ia duwen brother oh sister kan me kiripw?
2 Ahnsoun Kaudok en Peneinei nin Soutik kan: Tapwin peneinei kan ahneki pwukoa mwohn silangin Siohwa pwehn wia koasoandi en onop en Paipel kaukaule nin duwen peneinei ehu me katapan. (Deud. 6:6, 7) Brother oh sister kiripw kan me sohte ahneki pwukoa en peneinei pahn kak doadoahngki ahnsou wet ong pein onop Paipel oh wia roporop. E kesempwal ong kitail koaros en “isaneki ahnsou mwahu” pwehn onop oh doudouloale pwe en kolokol nanpwungmwahu rehn Siohwa mendahki “ahnsou pwukat ahnsou suwed kei.”—Ep. 5:15, 16.
3, 4. Kaweid dah kan me kohda me pid dahme kitail onopki? Ia ahmw mehn akadei?
3 Dahme en Onopki: Peneinei kan kak onop ire kan sang Kahn Iroir, duwehte “Sawas kan ong Peneinei Pwehn Kak Ahneki Nsenamwahu” oh “Ong Neitail me Pwulopwul kan” oh pil ire teikan me sohte kin onopki nan mihting en mwomwohdiso. Oh pil Watch Tower Publications Index oh Watchtower Library en CD-ROM kak sewese iuk en diar ire kan me kak wiahiong ahnsoun omw onop en Paipel nin duwen peneinei ehu en kaperen.
4 Sang ni wadekpene Paipel ni soh karuwaru, koaros nan peneinei pahn tamataman oh doadoahngki mouren kaweid pwukat nan arail mour. (Ipru 4:12) Ahnsoun teikan ke kak kilang oh koasoiapene kasdo kan me kohsang sapwellimen Siohwa pwihn. Mie ahnsou mwahu laud en pilada dahme ke pahn onopki oh ia duwen en onopki. Ke sou idek rehn ahmw peneinei dahme re men onopki?
5. Dahme kahrehda pein onop oh onop en peneinei uhdahn kesempwal nan atail mour ahnsou wet?
5 Dahme Kahrehda Kesempwal Met: Kakehlailih atail nanpwungmwahu rehn Siohwa pahn kaunopada kitail en ‘nan kapehd kehlail, oh mwasahn dahme KAUN-O pahn ketin wiahda pwe en ketin kapitkitaila.’ (Eks. 14:13) Pahpa oh nohno kan anahne sapwellimen Koht kaweid pwehn kakairada seri kan “nanpwungen aramas suwed oh dipan akan.” (Pil. 2:15) Seri kan anahne sawas en powehdi suwedlahn tiahk en aramas nan wasahn sukuhl rahn pwukat. (Lep. Pad. 22:3, 6) Pwopwoud kan anahne kakehlailihala arail “sahl silipwoat” rehn Siohwa. (Ekl. 4:12) Eri, kitail en doadoahngki ahnsou mwahu me luhluhwe pwehn kakehlahda atail “pwoson sarawi”!—Sud 20.