Koasoandi Kapw ong Mihting en Mwomwohdiso
1, 2. Wekidekla dah kan me pahn wiawi ni tepin sounpwong en January 2009?
1 Nan wihk en April 21-27, 2008, mie rohng kaperen ehu me kowohng riatail kan koaros nan sampah. “Tepida sang January 1, 2009, Pwuhk Study en mwomwohdiso pahn iangete Sukuhl ong Sapwellimen Koht Doadoahk oh Mihting en Kalohk. Pwuhk Study en mwomwohdiso pahn uhd adanekihla Onop en Paipel en Mwomwohdiso.”
2 Koasoandi ong Mihting en Ehuehu Wihk: Mihting wet iangahki koul oh kapakap pahn reireiki awa ehu minit 45. Mihtingo pahn tepikihda koul oh kapakap (minit 5), mwuri Onop en Paipel en Mwomwohdiso (minit 25). Sukuhl ong Sapwellimen Koht Doadoahk (minit 30) pahn wiawi mwurinte mwo. Eri, ehu koul (minit 5) pahn tepiada Mihting en Kalohk (minit 35). Mihting pahn imwikihla koul oh kapakap (minit 5). Pwehn sewese iuk en kaunopada ong mihting pwukat, koasoandi ong Onop en Paipel en Mwomwohdiso, Sukuhl ong Sapwellimen Koht Doadoahk, oh Mihting en Kalohk pahn kohda sang Atail Doadoahk Ong Wehio ehuehu sounpwong.
3. Ia duwen mihting en Onop en Paipel en Mwomwohdiso pahn wiawi?
3 Onop en Paipel en Mwomwohdiso: Mihting wet pahn duwehte onop en Kahn Iroir. Sohte pahn anahne en kousapahlih onop en wihk samwalahro. Ahpw mihting anahne tepikihda kisin koasoi mwotomwot. Met pahn kihong ahnsou mwahu ong koaros en iang wia pasapeng mwotomwot. Presiding overseer pahn koasoanehdi emenemen elder en wia mihting wet ehuehu wihk.
4. Ni ahl dah Mihting en Kalohk pahn wekidekla?
4 Mihting en Kalohk: Mihting en Kalohk pahn duduwehte ahpw audepe kan pahn ekis mwotomwot. Pakair kan pahn wiawihki minit 5. Met ahnsou itar ong wia pakair kesempwal kan oh kisinlikou kan sang branch ohpis. Pakair kan duwehte koasoandi en kalohk, kamwakel, ripoht en mwohni oh kisinlikou kan me kalapw kohsang branch ohpis sohte anahne wadek ahpw pahn kohda ni wasa me pakair kan kin langada ie ong brother kan en wadek. Irail kan me mie arail padahk en kaunopada mwahu oh idawehn kaweid kan me kohda oh arail padahk en dehr reirei sang ahnsou me kohwong irail.
5. Erein wihk en mwemweit en sounapwalih me kin seiloak, ia koasoandi en mihting en mwomwohdiso?
5 Mwemweit en Sounapwalih me Kin Seiloak: Koasoandi en mwemweit en sounapwalih me kin seiloak sohte pahn wekidekla. Niare, Sukuhl ong Sapwellimen Koht Doadoahk oh Mihting en Kalohk pahn wiawi tepikihda koul. Mwuri sounapwalih me kin seiloak pahn wia padahk minit 30. Duwen me kin wiawi ni wihk en mwemweit, ehu soutiko pahn koasoandi ong Onop en Paipel en Mwomwohdiso me pahn tepikihda koul oh mwuri ehu padahk sang sounapwalih me kin seiloak. Mihtingo pahn kaimwisekihla koul oh kapakap.
6. Ia pwukoa en sounapwalih en pwihn?
6 Tuhpenehn Kalohk: Elder kan pahn koasoanehdi sounapwalih kan en pwihn ong kalohk oh sewese emenemen nan pwihno. Ma sounsawas kan (ministerial servant) anahne kapwaiada pwukoa wet, e anahne idihdda nin duwen “sounsawas en pwihn.”
7. Dahme kitail kasikasik sang koasoandi kapw en mihting en mwomwohdiso?
7 Duwen me kileldi, e sansal me koasoandi kapw en mihting me kitail pahn ahneki pahn wia ahnsou mwahu en paiekihda kangoang kan me pahn kakehlailih atail nanpwungmwahu rehn Siohwa. Met pahn kahrehiong kitail en wia sounkalohk oh sounpadahk koahiek kei, oh kaiahne en wiahda wa mwahu nan doadoahk en kalohk.—Ep. 4:13, 14; 2 Tim. 3:17.
8. Ia duwen en emenemen kaunopada mwahu ong mihting pahn sewese kitail oh meteikan en paiekihda?
8 Onopada mwahu mwohn mihting pwukat pahn sewese kitail en medemedewe ire kesempwal kan erein ehuehu mihting. Kitail koaros pahn ahneki ahnsou mwahu en iang pasapeng kan, me pahn kihda kangoang mwahu nanpwungatail. (Rom 1:11, 12; Ipru 10:24) Atail mehn akadei iei en ‘wia atail kekeirda en sansal’ pwehn “padahkihong aramas akan mahsen en Koht ni mehlel.”—1 Tim. 4:15; 2 Tim. 2:15.
9. Dahme kitail pahn koasoanehdi nan kapehdatail, oh pwekida?
9 Kitail perenki wekidekla laud wet ong koasoandi en mihting kan en mwomwohdiso. Kitail koaros toukihda pein kitail ong kaweid me “ladu lelepek oh loalokong” kin kihda oh karanih rehn atail Silepe Lapalap nin duwen e kaunopada kitail ong “apwal” me kerendohr.—Mad. 24:21, Luke 12:42; Ipru 13:20, 21; Kaud. 7:14.