Ke Kak Wia Emen Sounpadahk!
1. Soangen kapai tohrohr dah me sounkalohki Wehio koaros ahneki?
1 Ehu me keieu kansenamwahu nan doadoahk en kalohk iei en kasukuhlihada emen nan padahk mehlel. Inenen kansenamwahu en kilang emen mwekidki rohng en Wehio oh sewese ih en karanihala Kaunen lahng oh sampah. (Seims 4:8) Sounkalohki Wehio koaros kin wiahki arail mehn akadei en kasukuhlih emen me raparapahki padahk mehlel oh kilang menet wiahda wekidekla kan nan eh mour oh madamadau oh wiewia.—Mad. 28:19, 20.
2. Dahme kahrehda ekei kin pweiek en wia onop en Paipel rehn meteikan? Dahme pahn sewese irail en powehdi kahpwal wet?
2 Likih Siohwa: Mahso, mie ladu lelepek kan kin peikasalki ma re warohng en wia arail pwukoa. Arail likih Siohwa Koht kahrehiong Moses, Seremaia, Eimwos, oh aramas teikan en powehdi arail peikasalki pein irail oh eri kak kapwaiada arail doadoahk kesempwal. (Eks. 4:10-12; Ser. 1:6, 7; Eimw. 7:14, 15) Ahn wahnpoaron Pohl eimah kin ‘kehlailla.’ Ia duwen? E kasalehda me ‘Koht me ketin kakehlailiada.’ (1 Des. 2:2) Ei, kitail koaros kak likih Siohwa en ketikihda sawas, erpit, oh kehl me kitail anahne pwehn wia onop en Paipel me kin pweida.—Ais. 41:10; 1 Kor. 1:26, 27; 1 Pit. 4:11.
3, 4. Soangen kasukuhl dah kan mie me kin sewese kitail en kak padahngki Mahsen en Koht?
3 Alehdi Kasukuhl: Atail Sounpadahk Lapalap Siohwa Koht ketin kaukaule kasukuhlih kitail ki prokram en kasukuhl me kohsang nan Paipel pwe kitail en kak wiahla sounpadahk koahiek kan. (Ais. 54:13; 2 Tim. 3:16, 17) Ale kasukuhl wet sang ni ahmw pahn kin wia uwen ahmw kak en kalaudehla ahmw wehwehki iren Paipel kan oh kamwahwihala ahmw koahiek en padahkihong meteikan duwen padahk mehlel. Mendahki Sukuhl ong Sapwellimen Koht Doadoahk oh Mihting en Kalohk me wiawihda ong kahrepe wet, ahpw mihting koaros kin kasukuhlih kitail en ese padahngki duwen Mahsen en Koht.
4 Nantihong esehla en wia padahk ni koasoi mengei, mendahki ma kitail pil pahn padahngki duwen padahk mehlel kan me loal. Pwuhk en Ministry School, pali 227 kin kawehwehda: “Ke anahne uhdahn wehwehkihla ire kan me ke pahn koasoia mwohn ahmw pahn kak kawehwehiong meteikan.” Atail kin iang pasapeng ni mihting kan pahn sewese kitail en katengehdiong ire kesempwal nan atail madamadau pwehn kak doadoahngki mwuhr. Eri kaunopada mwahu oh ke pahn pehm me ke kak padahkih meteikan.
5. Pil ia elen kasukuhl teikan nan mwomwohdiso me kak sewese kitail en koahiekla wia padahk?
5 Sang nin tepio, sounkalohk Kristian akan kin sukuhlki sang emenemen ni arail kin doadoahkpene nan doadoahk en katohnpadahk. (Luk 10:1) Ma kak, iang sounkalohk koahiek kan, me duwehte pioneer kan, elder kan, oh sounapwalih me kin seiloak kan ni ahnsou me kitail kin wia onop en Paipel rehn meteikan. Tehk mwomwen arail kin doadoahngki karasaras mengei kan oh kilel kan oh mehn sawas teikan me mi nan neitail pwuhk kan pwehn kawehwehda padahk mehlel. Peki arail sawas ong ia duwen ke kak kamwahwihala ahmw kin padahk. (Lep. Pad. 1:5; 27:17) Kitail en kalahnganki kasukuhl wet sang rehn riatail Kristian pwehki ni mehlel met kin pwilisang rehn Koht.—2 Kor. 3:5.
6. Dahme uhdahn anahn pwehn wiahla soun padahngki Mahsen en Koht?
6 Liki Siohwa oh paiekihda kasukuhl me e kin ketikihda. Kapakapki pwe ken kekeirda. (Mel. 25:4, 5) Ke pahn pil iang ahneki peren en sewese emen en wiahla soun padahngki Mahsen en Koht, duwehte iuk!