Dehr Irehiukedi—Powehdi Pepehm me Dene Ke Sohte Kak
1. Dahme kahrehda ekei kin pweiek en tepida wia onop en Paipel?
1 Ke kin pweiek en tepida ehu onop en Paipel pwehki omw sohte likih me ke koahiek en wia met? Ekei pak, ladu lelepek kan en mahs me duwehte Moses oh Seremaia kin pehm me re soakoahiek en wia ar pwukoa. (Eks. 3:10, 11; 4:10; Ser. 1:4-6) Ihme kahrehda me tohto kin ahneki soangen pepehmohte. Ia duwen arail kak powehdi pepehm wet?
2. Dahme kahrehda kitail en dehr itarkihte kalohk ihmw lel ihmw oh mweidala meteikan nek wia onop en Paipel?
2 Kitail anahne tamataman me Siohwa sohte ketin mahsanih me kitail en wia mehkot me kitail sohte kak wia. (Mel. 103:14) Eri atail pwukoa en katohnpadahk de padahk iei pwukoa ehu me kitail kak kapwaiada. (Mad. 28:19, 20) Met kaidehn pwais kaselel ehu me Siohwa ketikihong irail akante me uhdahn eselahr doadoahk wet de me keieu koahiek nanpwungatail. (1 Kor. 1:26, 27) Kahrehda, kitail en dehr itarkihte kalohk ihmw lel ihmw oh mweidala meteikan nek wia onop en Paipel.
3. Ia duwen Siohwa eh ketikihong kitail koahiek en wia onop en Paipel?
3 Siohwa Ketikihong Atail Koahiek: Atail koahiek en katohnpadahk kin kohsang rehn Siohwa. (2 Kor. 3:5) Nan sapwellime pwihn, e ketin padahkihong kitail padahk mehlel en Paipel me aramas me alehdi sukuhl laud pil sehse. (1 Kor. 2:7, 8) E ketin kilelehdi sapwellimen Sounpadahk Lapalapo Sises wiepen padahk kan ong kitail en alasang, oh pil ketikihong kitail kasukuhl nan mwomwohdiso. Patehng met, Siohwa ketikihong kitail mehn onop kan me kitail anahne pwehn padahngki Paipel. E ketikihda mehn doadoahk kan me duwehte pwuhken Paipel Padahngki, me kin padahngki padahk mehlel ni ahl me keieu mwahu oh mengei en wehwehki. Eri en onop Paipel rehn emen sohte pahn apwal duwehte atail kin medewe.
4. Dahme kahrehda kitail kak likih me Siohwa pahn ketin sewese kitail?
4 Moses oh Seremaia kak kapwaiada ara pwukoa kan pwehki Siohwa ketin sewese ira. (Eks. 4:11, 12; Ser. 1:7, 8) Kitail pil kak peki Siohwa en ketin sewese kitail. Pwe ni atail kin wia onop en Paipel, kitail kin padahkihong emen padahk mehlel duwen Siohwa oh met kin kaperenda kupwure. (1 Sohn 3:22) Eri, ken akadeiong iang wia onop en Paipel, doadoahk ehu me keieu kaperen oh wia kapai laud nan doadoahk en kalohk.