Rahn Tohrohr Ehu ong Tapihada Wia Onop en Paipel
1 Tepida nan January, ehuehu mwomwohdiso pahn koasoanehdi ehu Rahn Kaunop de Rahn Sarawi en ehuehu sounpwong, mwein keieun wihk, pwehn nsenohki tapihada wia onop en Paipel. Mendahki ma tohnihmw kan sohte men wia onop en Paipel, sounkalohk kan kak kihla pwuhken Kupwurki de makasihn kapw kan. Elder kan oh sounsawas kan koaros anahne iang doadoahk wet uwen arail kak oh sewese sounkalohk kan en tapihada wia onop en Paipel.
2 Pwihnen elder kan en mwomwohdiso pahn koasoanehdi ma Rahn Kaunop de Rahn Sarawi me pahn wia doadoahk en tapihada wia onop en Paipel. Re anahne en pwurepwurehng katamankin koasoandi wet pwe sounkalohk kan kak kaunopada oh wia uwen ar kak pwehn tapihada wia onop en Paipel sang ihmw lel ihmw oh pil ahnsou me re pwurehng tuhwong aramas me perenki rong.
3 Ia Duwen en Kaunopada: Kitail kak diar padahk kan ong pwuhken Kupwurki ong tapihada wia onop en Paipel nan pali 6 en Atail Doadoahk Ong Wehio en September 2007. Ekei pahn men doadoahngki tract me koasoia Ke Sou Men Esehla Duwen Padahk Mehlel? Kitail kak tapihada wia onop en Paipel ni ahnsou me pwurehng pwurala rehn aramas kan me kin ale neitail makasihn kan. Ni ahnsoun mihting mwohn kalohk me pahn reireiki minit 10 de 15, emen elder de sounsawas pahn koasoia de kamwomwada ehu de riau ong ia duwen en tapihada wia onop en Paipel.
4 Kaidehn koaros pahn men iang onop en Paipel de pil pousehla arail onop en Paipel. Ahpw kitail sohte pahn pweiek sang wia onop en Paipel, pwehki Siohwa me kahrehdo irail me rasehng sihpw kan ong sapwellime pwihn. (Sohn 6:44) Atail pwukoa kaidehnte kamwerehdi weren tuhkehn padahk mehlel ahpw kakairada oh kalamwur werentuhkeo oh met pidada onop en Paipel rehn aramas me men esehla Siohwa. Sang ni atail wia met, kitail ahneki pwais kaselel en wia tohndoadoahk kei en Koht.—1 Kor. 3:9.