Sewese Irail kan me Sohte Koahiek en Wadawad
1. Soangen kahpwal dahieu kitail kin lelohng nan doadoahk en kalohk?
1 Nan atail doadoahk en kalohk, ekei ahnsou kitail kin tuhwong aramas akan me sohte koahiek en wadawad oh e kin apwal en padahkihong irail padahk mehlel. Dahme kitail kak wia?
2. Ia duwen kitail kak kasalehda wahu ong irail kan me sohte koahiek en wadawad? Dahme kahrehda met kesempwal?
2 Wauneki Irail: Siohwa kin ketin kesempwalki audepen mohngiong en aramas men ahpw kaidehn uwen sukuhl me e alehda. (1 Sam. 16:7; Lep. Pad. 21:2) Ihme kahrehda kitail sohte kin mwamwahliki irail kan me sohte koahiek en wadawad. Irail pahn kakete perenki ale atail sawas ma kitail pahn kasalehda wahu oh kanengamah. (1 Pit. 3:15, 16) Met pil kin wehwehki me kitail sohte pahn idingkihong aramaso en wadek iren Paipel kan oh parakrap kan. Ni eh pahn kalaudehla eh wehwehki padahk mehlel en Paipel, e pahn men kamwahwihala eh koahiek en wadawad pwehn perenki wadek Mahsen en Koht “oh medemedewe . . . nin rahn oh nipwong.”—Mel. 1:2, 3.
3. Soangen ahl dah kan ke kak doadoahngki pwehn sewese irail kan me sohte koahiek en wadawad?
3 Ahl kan en Sewese Tohnsukuhl en Paipel kan: Kitail kak doadoahngki kilel kan pwehn padahkih irail oh sewese irail en tamataman dahme irail kin sukuhlki. Ke kak idek rehn omw tohnsukuhlo dahme e kilang nan kilelo nan pwuhk me kumwa kin onopki. Mwurin mwo ke kak doadoahngki peidek kan pwehn sewese ih en wehwehki dahme e kak sukuhlki sang nan kilelo. Doadoahngki iren Paipel kan me kin kasalehda ire kesempwal kan me pid kilelo. Ke pil kak doadoahngki kilel kan pwehn kousapahlih amwa onopo. Kanaiehng en dehr koasoia ire kan me nohn tohto. Kasalehda oaralap oh ire kesempwal kan en iren onopo, oh kanaiehng en dehr koasoia ire kan me sohte kin pid oaralapo. Wadek ire kan sang nan Paipel, oh doadoahngki peidek kan pwehn sewese tohnsukuhlo en wehwehki dahme iren Paipel pwukat kin padahngki. Met kak kalaudehla eh ineng en kamwahwihala eh wadawad pwehn pein rapahki padahk mehlel kan en Paipel.
4. Ia duwen kitail kak sewese atail tohnsukuhl kan en kamwahwihala arail wadawad?
4 Sawas kan en Kamwahwihala Wadawad: Aramas akan me sohte koahiek en wadawad ele kak wehwehki oh tamataman ire kan. En rong kanaiehng sounwadawad men en Kahn Iroir oh kilikilang nan nah makasihn, oh kapwurehiong lepin lokaia kan ni ngihl tikitik, pahn kak sewese emen en kamwahwihala eh wadawad. Nan ekei sahpw kan, elder kan ele pahn koasoanehdi pwihn kan ong kasukuhl en wadawad nan mwomwohdiso. Soangen sawas pwukat kak sewese kitail en sewese irail kan me sohte koahiek en wadawad en wehwehki “Pwuhk Sarawi” me kak kihong irail erpit me pahn kahluwalahng nan mour soutuk.—2 Tim. 3:15.