Ia Duwen Omw Kak Sewese Irail kan me Ahneki Kahpwal en Wadawad

1. Padahngki duwen Paipel ong irail kan me ahneki kahpwal en wadawad kin kasalehda kahpwal dah kan?

¹ Tohnihmw kan me ahneki kahpwal en wadawad pahn ele men esehla duwen padahk mehlel, ahpw re pahn kakete soansuwedki arail pahn sukuhlki duwen Paipel oh pwuhk teikan. En kihong soangen aramas pwukat pwuhken Paipel Padahngki nin tapio ele pahn sohte nohn pweida mwahu. Ia duwen atail kak sewese irail en esehla duwen padahk mehlel? Se idek rehn sounkalohk koahiek kan me kohsang soangsoangen sapw 20 samwa ia duwen arail wia met. Iren mehn sawas kan me re kasalehda kileldi pah.

2. Mehn sawas dah kan me uhdahn mwahuong sewese emen me ahneki kahpwal en wadawad?

² Ma emen tohnsukuhl en Paipel sohte koahiek en wadawad de sohte kak wadawad, mwein ke pahn kak tepikihda doadoahngki ehu kisin pwuhk, sohte lipilipil rehn Listen to God (lokaiahn wai) de Rong Koht pwe Ken Mour Kohkohlahte. Emen pioneer sang sapwen Amerika (United States) kin kasalehiong aramaso kisin pwuhk pwukat koaros oh idek rehn aramaso mehnia me e mwahuki. Ohpis en Sounkadehdehn Siohwa kan nan Kenya ripohtki me mehn sawas pwukat uhdahn mwahuong arail wasao pwehki ong mehn Aperika, re kin kalapw doadoahngki soai poadopoad kan sang arail kin doadoahngki peidek oh pasapeng kan. Ong irail kan me ale sukuhl laud ele pahn mengei en koledi wadawad oh peidek kan, soangen mwekid wet mwein pahn kahrehiong emen me sohte ale sukuhl laud en soansuwedkihda. Ma tohnsukuhlo ahneki ekis koahiek en wadawad, sounkalohk tohto pahn men tepikihda kisin pwuhken Rohng Mwahu Sang Rehn Koht! de Ke Kak Kompoakepahnki Koht! de mwein Nai Pwuhk en Poadoapoad Kan en Paipel.

3. Soahng dah kan me kitail anahne wehwehki duwen irail kan me sohte kak wadawad pwehn pweida ni atail kin kasukuhlih irail?

³ Kapinga Irail: Irail kan me sohte ale kasukuhl en wadawad ele kin namenek oh tohto irail kin pehm me sohte kateparail. Omw kin sewese irail en soanamwahu iei kahk keieu en padahkihong irail dahme mehlel. Aramas tohto me sohte kak wadawad irail aramas loalokong kei oh kak sukuhlki wadawad. Kasalehda omw waunekin irail. (1 Pit. 3:15, 16) Re pahn men pousehlahte onop rehmw ma re pehm me arail nannanti mie katepe oh ma re pehm me re kin kekeirda nan padahk mehlel. Eri ahnsou koaros kapinga irail.

4. Ia duwen atail kak kangoange irail kan me sohte koahiek en wadawad en kaunopada ong onop en Paipel?

⁴ Mehnda ma tohnsukuhlo sohte koahiek en wadawad, kangoange ih en kaunopada ong eh onopo. Ekei sounkalohk kan nan palieir en Aperika kin kangoange neirail tohnsukuhl kan en idek rehn emen kisehrail de kompoakparail me kak wadawad en sewese irail. Sounkalohk men nan Britain kin kangoange nah tohnsukuhl ko en kaunopada ni eh kin mweidohng ren doadoahngki nah pwuhko ong ekei parakrap erein arail onop pwe ren kak kilang ia uwen mengei en diarada pasapeng kan ma e lainihala. Emen brother nan India kin kangoange nah tohnsukuhl ko en kilang kilel kan en iren mehn kasukuhl ong wihk me kohkohdo oh medemedewe duwen ire ko.

5. Ia duwen atail kak kasalehda kanengamah ni ahnsou me kitail wia onopo?

⁵ Kanengamah: Sohte lipilipil mehnia pwuhk me ke doadoahngki, ke anahne keieu nsenohki ire kesempwal kan, oh sewese noumw tohnsukuhlo en wehwehki mwahu mepwukat. Ni tapio, mwein e pahn keieu mwahu en koasoipene erein minit 10 lel 15. Kanahieng en dehr koasoia ire kan me nohn tohto, mwein ke kak doadoahngki ekeite parakrap nan amwa onopo. Kanengamah ma noumw tohnsukuhlo kin wadawad wawai. E pahn mwekidki kasalehda eh koahiek en wadawad ni eh kakairada eh kalahngan ong Siohwa. Pwehn sewese noumw tohnsukuhlo en wia met, e pahn mwahu ma ke luke ih en iang towehda mihting sangete ni omw tepida onop reh.

6. Ia duwen atail kak sewese tohnsukuhl kan en esehla wadawad?

⁶ Ma tohnsukuhl ko esehla wadawad, re pahn mwadang kakairada arail nanpwungmwahu rehn Siohwa. (Mel. 1:1-3) Me tohto sewesehier neirail tohnsukuhl kan sang ni arail doadoahngki pwuhken Apply Yourself to Reading and Writing ong minit keite mwurin ehuehu onop. Ma tohnsukuhlo mworusala, mwein ke kak sewese kalaudehla eh koapworopwor ni omw kasalehiong ih soahng kan me e sukuhlkihdier. Kamehlelehiong me Siohwa pahn ketin kapaia eh kin nannanti, oh kangoange ih en kapakapki sawas. (Lep. Pad. 16:3; 1 Sohn 5:14, 15) Ekei sounkalohk nan Britain kangoange neirail tohnsukuhl kan en wiahda mehn akadei kan me re kakohng, ahpw keieu mehn akadei kan me ren kak pousehlahte wia, mwein keieu esehla mahs irekidien mesen nting kan, mwuri rapahkihda oh wadek iren Paipel kan me re pilada, oh wadek ekei neitail pwuhk kan me mengei en wadek. En sewese aramas en esehla wadawad kin pid kamwakid irail en men wia, kaidehn ihte en padahkihong irail ia mwomwe.

7. Dahme kahrehda kitail en dehr pweiek en kasalehda padahk mehlel ong irail me ahneki kahpwal en wadawad?

⁷ Siohwa sohte kin ketin mwamwahliki irail kan me sohte ale sukuhl laud. (Sohp 34:19) Dahme mi nan mohngiongirail ih me Siohwa kin ketin tetehk. (1 Kron. 28:9) Eri ke dehr pweiek en kasalehda padahk mehlel ong irail kan me kin ahneki kahpwal en wadawad. Mie mehn sawas kaselel tohto me ke kak doadoahngki pwehn tapiada onop. Kedekedeo, ke kak pousehla amwa onop ni omw uhd doadoahngki pwuhken Paipel Padahngki pwehn sewese kalaudehla eh wehwehki duwen Paipel.