Ia Duwen en Kaunopada ong Mihting en Kalohk
1. Ia kahrepen Mihting en Kalohk? Ia duwen kitail kak paiekihda mihting wet?
1 Mihting en Kalohk kin wiawi pwehn sewese kitail en koahiekla nan doadoahk en kalohk. Pali laud en padahk kan kin pid en kalohki rongamwahu en Wehio, katohnpadahk, oh pakairki sapwellimen Koht kadeik me pahn wiawi ni ahnsou keren. (Mad. 28:19, 20; Mark 13:10; 2 Pit. 3:7) Kitail kak paiekihda mihting kesempwal wet ma kitail pahn kaunopada mwahu oh iang pasapeng.
2. Ia duwen kitail kak kaunopada mwahu pwehn rong padahk?
2 Padahk: Pali laud en ahnsou, Atail Doadoahk ong Wehio kin kasalehiong brother me pahn wia padahk mehnia pwuhk de ire kan me e pahn doadoahngki. Ke kak wadek pwuhk de ire pwukat iangahki iren Paipel kan me kileldi, oh medemedewe ia duwen ke pahn kak doadoahngki ire pwukat nan omw kalohk.
3. Ia duwen kitail kak kaunopada ong padahk en Peidek oh Pasapeng?
3 Peidek oh Pasapeng: Met pahn wiawi duwehte onop en Kahn Iroir. Tepin oh kaimwiseklahn padahk wet pahn mwotomwot. Kilelehdi ire kesempwal kan nan ehuehu parakrap oh kaunopada en wia pasapeng mwotomwot kan.
4. Ia duwen ke kak kaunopada ong padahk me tohnmwomwohdiso kak iang koasoi?
4 Padahk oh Tohnmwomwohdiso Pahn Iang Koasoi: Padahk ehu pahn wiawi oh brother me pahn wia padahko pahn luke tohnmwomwohdiso en iang koasoi. Ma ke pahn kilelehdi ire kesempwal kan oh wadek iren Paipel kan me kileldi, ke pahn kak iang pasapeng ni ahnsou me brothero pahn kihda peidek kan. Brothero pahn nantihong luke tohnmwomwohdiso en iang koasoi ni ahnsou me e pahn koasoia ire kesempwal akan.
5. Dahme pahn sewese kitail en paiekihda kamwomwada kan?
5 Kamwomwada kan: Kamwomwada kan pahn wiawi nan ekei padahk kan pwehn kasalehda ia duwen kitail kak doadoahngki ire kan nan atail wasahn kalohk. Brother me pahn wia padahk pahn peki rehn elder kan de sounkalohk koahiek kan de pioneer kan en wia kamwomwada kan. Ke pahn kak medemedewe mwowe ia pahn mwomwen kamwomwada pwukat. Ni ahnsou me kamwomwada ehu kin wiawi, medewehla ia duwen ke pahn nda ni pein omw lokaia de ia duwen ke kak kawekila kamwomwadao ong soangsoangen tohnihmw kan. Dehr manokehla en wahda pwuhk de makasihn me pahn kadoadoahk nan kamwomwadao. Nan amwail Kaudok en Peneinei, e pahn mwahu en kamwomwada ekei padahk kan.
6. Dahme kahrehda kitail anahne kaunopada ong Mihting en Kalohk?
6 En iang towehda Mihting en Kalohk pahn kaperen ma kitail pahn kaunopada mwahu oh medemedewe duwen audepe kan mwohn mihtingo pahn wiawi. Ni atail pahn wia met, kitail pahn kak ehukihpene mehn kangoang kan nanpwungatail. (Rom 1:11, 12) Ma kitail pahn koasoanehdi ahnsou pwehn kaunopada ong Mihting en Kalohk, kitail pahn kak koahiekla en kapwaiada atail pwukoa kan.—2 Tim. 3:17.