Kaweid ong Irail ako me Mie Arail Pwais nan Mihting en Kalohk
Tepida sang Atail Doadoahk ong Wehio en sounpwong wet, koasoandi en Mihting en Kalohk pahn kamengeila. Kaweid kan oh mehn kataman kan pahn kasalehda ire kapw kan oh sewese kitail en wehwehki dahme sansalda nan Atail Doadoahk ong Wehio en sounpwong en May 2009 me oaralap koasoia “Ia Duwen en Kaunopada ong Mihting en Kalohk.”
◼ Padahk: Met iei padahk ehu me pahn kohsang neitail sawaspen Paipel me koasoandi ong kadoadoahk oh tohnmwomwohdiso sohte pahn iang koasoi. Me wia padahko pahn koasoiahte ire kan me pahn sewese laud tohnmwomwohdiso.
◼ Peidek oh Pasapeng kan: Met duwehte Onop en Kahn Iroir. Tepin oh kaimwiseklahn padahko pahn mwotomwot oh peidek kan pahn wiawi ong parakrap kan koaros. Me wia padahko sohte pahn nohn koasoi werei. Iren Paipel kesempwal kan kak en wadawad ma mie ahnsou. Sohte wadawad en parakrap pahn wiawi ma kaweid sohte kohda.
◼ Padahk oh Tohnmwomwohdiso Pahn Iang Koasoi: Tohnmwomwohdiso pahn iang koasoi nan padahk wet. E sohte pahn padahkte de pil peidek oh pasapengte.
◼ Kamwomwada kan oh Peidek ong Sounkalohk kan: Kaweid ong kamwomwada kin wehwehki me brother me wia padahko pwukoahki en kihda ehu kamwomwada. Sohte anahne ih me en wia kamwomwadao. Irail me e pahn pilada en wia kamwomwada pahn anahne koahiek oh wia mehn kahlemeng mwahu. Ma kak, e anahne kihong ahnsou laud ong irail. E pahn keieu mwahu en dehr doadoahngki sounkalohk kapw oh soakoahiek kan pwehn kamwomwada ia duwen doadoahk wet eh kin wiawi ihte pwe irail en kak iang mi mwoweo. Ahpw ekei me kapw kak wia tohnihmw. Sounkalohk kan me pahn wia kamwomwada anahne sohpeilahng tohnmwomwohdiso. Irail akan me peidek pahn kohwong pahn anahne mi mwoweo a kaidehn koasoi sang nan dewerail. Kamwomwada kan oh peidek ong sounkalohk kan anahne kasosohngda mwohn eh pahn wiawi. Ma solahr ahnsou oh brothero anahne kamwotehla eh padahko, e sohte pahn koasoanehdi en solahr wia kamwomwada de peidek ong sounkalohk kan. Sounsawas kan pahn anahne koasoiong soun koasoanehdi pwihn en elder kan de emen elder mwohn eh pahn pilada ihs me pahn iang ahneki pwais nan eh padahk.
Ma mie kaweid tohrohr ong ehu padahk, anahne tehk kanahieng kaweid kan. Ni Mihting en Kalohk eh pahn wiawi nin duwen me koasoandier powe, brother kan pahn sawas ong Mihting en Kalohk “me konehng oh koasoandi pwung.”—1 Kor. 14:40.