Koakon En Peidek

◼ Iaduwen kitail kak kanekehla atail padahk kan pwe mihding en mwomwohdiso en dehr daulih ahnsou me kileliong?

Ahnsou kin mwekid mwadang ni ahnsou me kitail kin ehukihong kompoakpatail kan duwen mehkot me mwahu. Ihme kahrehda, e kin kak apwal en wia atail padahk kan erein minit kan me kilelehiong. Dahme pahn sewese kitail en wia atail padahk nan erein ahnsou me kileliong?

Tepida mihding ni kuloak me kileliong. Ni ahnsou me mwomwohdiso pwon kin tuhpene, e pahn mwahu en luhke tohnmwomwohdiso kan en rapahki deuerail minit ehu de riau mwohn mihding pahn tepida pwe soahng koaros en soandi mwahu. (Eklesiasdes 3:1) Mihding kan me aramas malaulau kin tuhpene, duwehte mihding en tuhpene ong kalohk, sohte pahn tepida pwand pwehki ekei aramas pwand en kohdong tuhpene.

Kaunopada mwahu. Ehu ahl en wia padahk erein minit me kileliong iei en kaunopada mwahu. Medemedewe ia kahrepe ke wia ahmw padahk. Kasalehda duwen ire kesempwal kan ni sansal. Ken dehr koasoia duwen soangsoangen oaritik kan me pahn kahrehong sounrongorong kan en manokehla ire kesempwal kan. Wiahda ahmw padahk en mengei en wehwehki. Ma mie kamwomwada kan de interview kan nan ahmw padahk, ken sewese irail me pahn wia mehpwukat en kaunopada mwadang oh praktis mwowe. Wia uwen ahmw kak koaros en praktis ahmw padahk mwowe​—⁠praktis ngihl laud​—⁠pwehn kak tehk ma ahmw padahk reireiki minit me kileliong.

Kihpeseng ire kan me ke pahn koasoia nan ahmw padahk. Sohte lipilipil ma ke pahn wia padahk de ke pahn mweidohng tohnmwomwohdiso en koasoi, ke pahn diarada me e pahn mwahu ma ke pahn kihpeseng ire kan me ke pahn koasoia nan ahmw padahk. Medemedewe minit depe e pahn mwahu en koasoia ekei ire, oh ntingihdi met limwahn ire kan nan ahmw padahk. Mwurin mwo, ke pahn praktis ahmw padahk oh tehk ma ke kin koasoia ire pwukat erein minit kan me ke kilelediong. Ni ahnsou me ke mweidohng tohnmwomwohdiso en koasoi, kanahieng pwe ken dehr mweidong koaros en pasapeng ni tepio oh ke uhd pahn anahne kamwotomwotala minit kan me ke kilelehiong ire kesempwal kan me pahn kin kohda mwuhr. Irail brother kan me kin wia Onop en Kahn Iroir anahne mweidohng ahnsou itar en wia peidek en kousapahl kan ni imwin onopo. Oh pil, irail anahne kanahieng pwehn dehr daulih minit kan me pahn kilelediong koul oh kapakap mwurin onopo.

Mihding pahn nek ni kuloak me kilelediong. Ma padahk tohto kin patpene pwehn wiahla mihding ehu pwon, duwehte Service Mihding, emen emen brother me kin wia padahk kan anahne tamataman kuloak depe ah padahk pahn tepida oh kuloak depe e pahn nek. Dahme pahn wiawi ma mihding pahn daulih ahnsou me kilelehiong? Brother emen de tohto sang pahn anahne kamwotehla arail padahk kan ni arail pahn koasoia ire kesempwal kante pwe mihding pahn nek ni kuloak me kileliong. E sansal me emen me kak wia met kin koahiek en padahk.

Nin duwen tohnmwomwohdiso, kitail kak sewese brother me wia ah pwais ni atail pahn wiahda pasapeng kan me mwotomwot oh koasoiahte dahme pid duwen oaralap me kitail koasoia ahnsowo. Ni ahl wet, kitail koaros kak sawas pwe mihding kan koaros en wiawi ni ahl me “soandi mwahu.”​—1 Kor. 14:40.