Doadoahngki Mwahu Neitail Pwuhk kan
1. Ia duwen kitail kak kahlemengih Sises ni eh ketin kalahnganki dahme Siohwa kin ketikihda?
1 Mwurin Sises ketin kamwengehla pokon kalaimwun ehu, e ketin koasoanehdi pwe luhwen mwenge kan en nekinekla. (Mad. 14:19-21) Sises ketin kasalehda eh kalahnganki dahme Siohwa kin ketikihda, oh met wia mehn kahlemeng mwahu ong kitail en kin kasalehda “kasapahlkalahngan ong Koht.” Kitail kak wia met sang ni atail pahn doadoahngki soahng koaros me Siohwa kin ketikihda ni eh ketin doadoahngki pwihn en “ladu lelepek oh loalokong.”—Kol. 3:15; Luk 12:42; Mad. 24:45-47.
2. Dahme kitail anahne wia pwe luhwen neitail makasihn kan en dehr tohtohla?
2 Makasihn kan: Luhwen makasihn kan kak mwadang tohtohla. Ma neitail makasihn kan kin kalapw luhwehdi, kitail anahne kamalaulauehla uwen tohtohn makasihn kan me kitail kin oahte. Ahpw ia duwen makasihn kan me wereila? Audepen makasihn pwukat kin wia kesempwalte. Ma kitail pahn kolokolte makasihn kan me wereila, mwein sounapwalih en kalohk de emen elder tohrohr pahn kak sewese kitail ong ia duwen kitail en doadoahngki makasihn pwukat.
3, 4. Dahme ke anahne tamataman ni ahnsou me ke pahn ale pwuhk kapw kan nan atail Wasahn Kaudok?
3 Pwuhk Teikan: Ma kitail pahn kihla ehu pwuhk tohrohr, keieu kitail pahn tehk ma miher soangen pwuhko nan imwatail mwohn atail pahn ale me kapw kan sang nan atail Wasahn Kaudok. Kanahieng pwe ken alehte uwen tohtohn pwuhk me ke pahn anahne ong ehu wihk, oh ke nek pwurehng ale ma ke pil anahne.
4 Ong soangen pwuhk kan me ke pahn pein doadoahngki, oahte ihte uwen me ke uhdahn anahne. Ntingihdi edomw nan wasa me kileldi nan pwuhko. Met pahn sewese iuk en diarada noumw pwuhko ma e salongala. Ma ke kin doadoahngki Watchtower Library nan CD-ROM oh kin nekidala pein noumw makasihn kan, ele ke sohte pahn anahne oahte bound volume kan en the Watchtower oh Awake!
5. Dahme kitail anahne tamataman ni ahnsou me kitail kin kihla pwuhk kan?
5 Kihla Pwuhk kan: Kitail pahn nantihong en kin kihla neitail pwuhk kan ongete irail kan me uhdahn men wadek. Tamataman me kitail me kin uhdahn pwukoahki toukihda sawas ong soangen pwuhk pwukat me kitail kin doadoahngki nan kalohk. Ni atail pahn kihdi ehu pwuhk rehn tohnihmw kan, dehr pweiek en padahkihong irail me re kak toukihda sawas ong doadoahk en kalohk me kin wiawi nan sampah pwon.
6. Dahme kahrehda kitail anahne kesempwalki neitail pwuhk kan? Dahme met pahn kamwakid kitail en wia?
6 Sises ketin kamwenge meteikan ki kisin mwenge kan, ahpw e kin ketin kalapw kamwengehki aramas akan ki padahk mehlel. E mahsanih: “Kaidehkin pilawahte me aramas kak mourki, pwe mahsen koaros me kin pwilipwilsang nin doauesen Koht.” (Mad. 4:4) Neitail pwuhk kan kin padahngki padahk mehlel kan en Paipel me kesempwal ong emen en ahneki mour soutuk. (Sohn 17:3) Neitail pwuhk kan kin nohn kesempwal en kauwehla mwahl!