Kitail en Doadoahngki Neitail Sawaspen Paipel kan ni Ahl me Mwahu
1, 2. Soangen pepehm dah kan aramas kin ahneki me pid duwen neitail sawaspen Paipel kan, oh peidek dah kin kohda?
1 “I kin wadewadek noumwail sawaspen Paipel kan sang pahr 1965. I kin tehk iren Paipel kan ni ahnsou me I kin wadewadek, oh I kin tehk me soahng koaros me I wadek kin pahrekiong Pwuhk Sarawi. Sangete mahs, I men wehwehki duwen dahme mehlel duwen Koht oh Sises, oh met I kak nda ni mehlel me I diarada padahk mehlel kan nan Paipel sang ahi wadewadek noumwail sawaspen Paipel kan.” Met kohsang kisinlikou ieu me emen ohl kadaralahng poasen kaunen Sounkadehdehn Siohwa kan. Nan kisinlikouohte, e peki ma e kak onop Paipel rehn Sounkadehde kan.
2 Duwehte ohl menet me kalahnganki neitail sawaspen Paipel kan, aramas tohto nan sampah pwon pil kin kalahnganki neitail pwuhk, brochure, makisihn oh tract kan me “ladu lelepek oh loalokong” wiahda. (Madiu 24:45) Nan pahr kan koaros, sawaspen Paipel tohto kin wiawihda pwehn sewese aramas me mohngiong mehlel en “sukuhliki padahk mehlel.” (1 Timoty 2:4) Iaduwen atail kak doadoahngki neitail sawaspen Paipel kan ni ahl me keieu mwahu?
3. Dahme kitail kak wia pwe neitail sawaspen Paipel kan sohte pahn wohnohn mwahl nan imwatail?
3 Dehr Mweidohng en Wohnohn Mwahl: Pwehki kitail sohte kihla neitail sawaspen Paipel kan koaros, re kakete wohnohn mwahl nan imwatail. Dahme kitail kak wia pwehn dehr mweidohng met en wiawi? Kitail anahne doadoahngki atail loalokong ni ahnsou me kitail kin ale neitail pwuhk, brochure, makisihn oh tract kan ong kalohk. Kitail en dehr ale tohto, ahpw kitail ale ehu de riau oh mwurin atail kihla mehpwukat, kitail kak pwurehng ale pil ekei. Met pahn kak sewese kitail en kihla sawaspen Paipel koaros me kitail ale, oh sohte me pahn wohnohn mwahl nan imwatail. Oh pil, kitail kin diarada me makisihn tohto kin wohnohn mwahl nan imwatail, e pahn mwahu en katikala atail oaht en makisihn.
4. Dahme kak wiawi ma pwuhk tohto nan Kingdom Hall?
4 Pwuhk kan me Tohto Nan Kingdom Hall: Ma pwuhk ehu me nohn tohtohla nan mwomwohdiso, brother me apwalih pwuhk kan kak tehk rehn mwomwohdiso teikan pwehn kilang ma irail men ale ekei pwuhk kan. Sounkalohk kan kak kihla pwuhk pwukat rehn arail peneinei me sohte iang padahk mehlel, arail Paipel Study kan, de meteikan. Irail me kapw nan mwomwohdiso pahn perenki ale neirail pwuhk pwukat pwehn kihong nan neirail library.
5. Iaduwen kitail kak kasalehda me kitail kalahnganki neitail sawaspen Paipel kan?
5 Kitail men doadoahngki mwahu neitail sawaspen Paipel kan pwehn sewese aramas me mohngiong mehlel kan en sukuhliki duwen kupwuren Siohwa. Duwehte Sises sohte kauwehla mwahl mwenge ahnsou me e kamwenge pokono, kitail pil men doadoahngki mwahu neitail sawaspen Paipel kan me Siohwa ketikihong kitail. (Sohn 6:11-13) Audepen neitail sawaspen Paipel kan sohte kak sair mohngiong en aramas akan ma irail wohnohn mwahl nan imwatail de nan atail kopwou en kalohk kan. Ihme kahrehda, kitail en ale ihte pwuhk, brochure, makisihn oh tract me kitail pahn kihla oh doadoahngki neitail sawaspen Paipel kan pwehn sewese meteikan.—Pilipai 4:5.