Koakon en Peidek

◼ Ia duwen atail pahn ese ma kitail pahn pwilikihdi pwuhk rehn emen?

Me keieu kesempwal kitail en tehkada iei ma e perenki rong. Ma e kasalehda me e uhdahn perenki, kitail kak pwilikihdi reh Kahn Iroir, ehu neitail kisin pwuhk me pali 32, de pwuhk teikan me kitail kihseli ahnsowo. Kitail kin wia met mehnda ma kitail esehda me sohte itar de sohte nah mwohni pwehn toukihda ong doadoahk en kalohk sampah pwon. (Sohp 34:19; Kaud. 22:17) Ahpw kitail sohte men kihdi neitail pwuhk kan rehn aramas akan me sohte kin kesempwalki.—Mad. 7:6.

Ia duwen tohnihmw men eh kin kasalehda me e perenki? Eh kin men koasoakoasoiong kitail iei ehu kilel me e perenki rong. Eh kin rongorong, sapeng peidek kan, oh koasoia dahme e medemedewe kin kasalehda me e kin ideidawehn dahme kitail koasokoasoia. Ni eh kin iang kitail wadek Paipel kin kasalehda me e wauneki Mahsen en Koht. E pahn pil mwahu ma kitail idek reh ma e pahn wadek pwuhko. Sounkalohk kan anahne kasawihada mwahu ma aramaso perenki rong. Karasepe, ni atail kin kalohk nanial kan, e sohte konehng kitail en kihla neitail Kahn Iroir, kisin pwuhk kan, de pwuhk kan ong aramas sohte lipilipil. Ma kitail sohte kak kasawihada ma aramaso perenki, e pahn mwahu ma kitail kihong ih kisin doaropwe de tract.

Pil duwehte, uwen tohtohn pwuhk me sounkalohko ale sang ni wasahn pwuhk pahn poahsoanda sang uwen me e anahne pwe en kapwaiada eh pwukoahn kalohk, kaidehn uwen laud en mwohni me e toukihda. Sawas kan sohte kin kohda pwehn pwainda pwuhk kan ahpw e kin kohda pwehn utung mehkan koaros me pidada atail doadoahk en kalohk nan sampah pwon. Atail kalahngan pahn kamwakid kitail en toukihda, kaidehn sang nan atail pai, ahpw uwen me kitail kak pwehn utung doadoahk en Wehio. (Mark 12:41-44; 2 Kor. 9:7) E pil pahn kamwakid kitail en alehte dahme kitail anahne oh dehr wiakau sawas kan me kohda.

[Kawehwepen kilel nan pail 2]

Sounkalohk kan anahne kasawihada mwahu ma aramaso perenki rong