E Mwomw Mwahu de Soh?

E mwahu en idek peidek wet ni ahnsou me kitail pahn kin kihla neitail kisin pwuhk kan. Sohte lipilipil soangen pwuhk dah me teh kan kin limilimpene, poh kan sarasangehr, pwelepwella, de pil teidi, e pahn kahdsuwedihala atail pwihn oh kak kahrehiong tohnihmwo en sohte men kilang uwen kaselel oh mwahu en padahk me pid komour me mi nan pwuhko.

Ia duwen atail kak kanahieng neitail pwuhk kan pwe en dehr mwomw suwed? Me tohto kin diarada me e mwahu en koasoanehdi pwuhk kan nan arail kopwou en kalohk kan pwe pwuhk kan me kin mwomw teieu en kin mihpene. Karasepe, nan kopwou ko kin mie wasahn pwuhk, kisin pwuhk kan, oh pil mie wasahn doaropwe kan oh pil soahng teikan. Eri ni ahnsou me re kin kapwurehiong neirail Paipel oh pil kisin pwuhk kan nan kopwouwo, re kin wia met ni kanai pwe pwuhk kan en dehr teidi. Ekei kin doadoahngki kidimen pwuhk kan de pil pilastik kan pwehn kihong neirail kisin pwuhk kan loale. Sohte lipilipil soangen wiepe dah me kitail kin doadoahngki, kitail sohte men kihong aramas akan kahrepe ieu me irail en kauwehki atail doadoahk en kalohk pwehki kitail kihong neirail pwuhk me mwomw suwed.—2 Kor. 6:3.