Doadoahngki Sawaspen Paipel kan ni Loalokong

Sises ketin mahsanih: “Nin duwen amwail aleier nin sohte pweipwei, kumwail pil kihwei nin sohte pweipwei.” (Mad. 10:8) Kitail kin kapwaiada kaweid wet ni atail sohte kin ndahng aramas kan ren pwain Paipel de sawaspen Paipel kan. (2 Kor. 2:17) Ahpw, sawaspen Paipel pwukat kin audaudki padahk mehlel kesempwal kan sang Mahsen en Koht. Doadoahk laud oh mwohni laud kin anahn pwehn wiahda oh kadarpeseng nan mwomwohdiso koaros nin sampah. Ihme kahrehda, kitail en alehte uwen me kitail anahne.

Doadoahngki loalokong ni omw kihong meteikan sawaspen Paipel kan, pil ni wasahn kalohk en wehipokon kan. (Mad. 7:6) Kitail en dehr ihte kihla sawaspen Paipel kan rehn irail me kin alu daulih kitail ahpw kitail en nantihong koasoiong irail pwehn ese ma re perenki. Ia duwe, ke kak sapengki ei ong peidek pwukat me mi nan koakon wet? Ma ke sohte kak tehkada ma emen kin perenki rong, e pahn mwahu en kihongete ehu kisin doaropwe. Ahpw, kitail pahn perenki kihong ih ma e peki ehu makasihn de pwuhk teikan.—Lep. Pad. 3:27, 28.