Kasalehda me Kitail Kalahnganki Neitail Paipel kan oh Sawaspen Paipel kan
1 Ni ahnsou me Nanmwarki Sosaia koasoanehdi koasoandi kan pwehn kamwahuwihala Tehnpas Sarawio, e kapinga irail oko me kin wia doadoahko ni e mahsanih: “Ohl akan me wie apwahpwalih doadoahko me likilik mehlel, kahrehda sohte anahnepen aramas en dawih mwohni ko me re ale.” (2 Nanmwarki 22:3-7) E sansal me ohl pwukat kin kalahnganki mehkan me sarawi pwe re kin kesempwaliki oh doadoahngki mwahu dipwisou kan me kohwong irail. Rahnwet, ni atail kin iang doadoahk sarawi en kalohki Rongamwahu en Koht, kitail pil anahne lelepek ni atail pahn kesempwaliki soahng kan me kohwong kitail en doadoahngki.
2 Nan Kalohk: Ma kitail kin wehwehki oh kalahnganki rohng kesempwal me mihmi nan neitail pwuhk kan, brochure kan, makisihn kan oh tract kan oh ma kitail wehwehki me Society kin doadoahngki diren mwohni pwehn wiahda mehpwukat, e pahn kamwekid kitail en kesempwaliki neitail Paipel oh sawaspen Paipel kan. Kitail en dehr kihseli mwahl neitail pwuhk kan, brochure kan, makisihn kan oh kihong aramas akan me sohte kin kalahnganki rohng me mihmi nan Paipel. Ma aramas emen kin kasalehda me e ekis perenki Rongamwahu, kitail en kihong ih nah tract kaidehn pwuhk, brochure de makisihn.
3 Kitail en kihseli pwuhk kan, brochure kan oh makisihn kan ni ahl ehu me pahn kasalehda me pein kitail kesempwaliki soahng pwukat. Kitail en dehr kihdi mwahl pwuhk pwukat nan wasa kan me wehi pokon kin kohpene. Mwohn ke kohla ale pil ekei pwuhk kan, brochure kan, makisihn kan de tract kan sang Kingdom Hall, e pahn mwahu en tehk mahs dahme mihmi ni imwomw oh nan ahmw ehden kalohk pwehn dehr ale tohto sang dahme ke uhdahn pahn doadoahngki. Ma ke kin oaht makisihn depe, ahpw ke diarada me makisihn kan kin tohto sang dahme ke kin uhdahn doadoahngki, e pahn mwahu en katikitikala ahmw oaht en makisihn kan.
4 Pwuhk kan me Kitail kin Doadoahngki ong Pein Atail Onop: Kitail en oaht ihte pwuhk kan me kitail uhdahn anahne. Kitail anahne kanahieng pwe kitail en dehr oaht nohn tohto soangen pwuhk kan duwehte Deluxe Bibles, Reference Bibles, Concordance, Index, Insight Volumes, Proclaimers oh pwuhk laud teikan, pwe kitail uhdahn pahn tamataman me Society kin doadoahngki mwohni laud pwehn wiahda pwuhk pwukat.
5 Ke kin tamataman en ntingihdi edomw oh ahmw address nan noumw pwuhk kan? Ma ke pahn wia met, ke sohte anahne pwurehng ale pil ehu noumw pwuhk kan ma noumw pwuhk salongala. Ma noumw pwuhken koul, Paipel de pwuhk teikan salongala, mwein ke kak rapahki pwuhk pwukat nan Kingdom Hall de wasahn kapokon (nan wasa kan me re kin kihpene pwuhk kan oh dipwisou kan me re diar mwurin mihding kan).—Luk 15:8, 9.
6 Kitail en nantihong kesempwaliki oh doadoahngki mwahu neitail pwuhk kan, brochure kan, makisihn kan oh tract kan. Met kin wia ahl ehu me kitail kak kasalehda me kitail lelepek ni atail kin doadoahngki soahng pwukat koaros me Siohwa kin ketikihong kitail pwehn utungada doadoahk en Wehio.—Luk 16:10.