Ia Duwen Omw Pahn Sapeng?
1. Dahme kahrehda e pahn mwahu en kahlemengih Sises ahnsou me aramas kin peidek rehtail?
1 Leledo rahnwet, aramas akan kin pwuriamweikihla uwen mwahu en sapwellimen Sises pasapeng kan. Ni ahnsou me kitail kin wia atail doadoahk en kalohk oh aramas kin peidek rehtail, e pahn mwahu ma kitail kin alasang Sises.—1 Pit. 2:21.
2. Dahme pahn kak sewese kitail en kihda pasapeng me katapan ong peidek ehu?
2 Rong Mahs: Sises kin ketin tehk mwahu madamadau en me wia peideko. Ekei pak ke pahn anahne peidek rehn aramaso pwe ken kak diarada eh madamadau. Emen me kin idek, “Ke pwoson Sises?” mwein kin idek ia kahrepen omw sohte kin kasarawi Krismas. Ma ke kasawihada madamadau en aramas me wia peideko, eri ke pahn kak wia pasapeng me mie katepe.—Luk 10:25-37.
3. Dahme kak sewese kitail en diar pasapeng kan me pwung oh mehlel?
3 Sapengki Mahsen en Koht: Doadoahngki Paipel en sapengla peidek kan iei me keieu mwahu. (2 Tim. 3:16, 17; Ipru 4:12) Pwuhken Reasoning oh “Bible Topics for Discussion” kin kak wia sawas laud ong kihda pasapeng kan me pwung oh mehlel. Ma aramas me wia peideko sohte kin kamehlele Paipel, a ke kak ehukihong ih iren Paipel kan ni kamantik. Kangoange aramaso en medemedewe oh tehk mwahu mehn kadehde pwung kan oh erpit me dierek nan Paipel. Sang ni omw pahn kahlemengih Sises, eri omw pasapeng kan pahn duwehte “kilel me wiawihkihda kohl oh kapwatkihda silper,” me kin wahun, kaselel oh kesempwal.—Lep. Pad. 25:11.
4. Soangen ahnsou dah kan me pahn keieu mwahu kitail en dehr sapeng peidek kan?
4 Kitail Anahne Sapengla Peidek Koaros? Ma ke sohte ese pasapeng ong peidek ehu, a ke dehr namenengki nda: “I sehse, ahpw I kak rapahkihda pasapeng en omw peideken oh pwurehng pwurodo rehmw.” Ni atail kin kasalehda me kitail sehse oh kitail kin nsenohki arail peidek oh pepehm pahn kakete kamwakid irail en luke iuk en pwurehng pwurala rehrail. Ma ke pehm me peideko kohsang rehn aramas me kin uhwong oh ihte e men wia akamai, kahlemengih Sises oh kauhdi koasoakoasoipeneo. (Luk 20:1-8) Ih pil duwen ma emen me sohte kin men ese me mehlel ahpw ihte men akamai, eri ni kadek pil kauhdi koasoakoasoipeneo. Oh kowe uhd rapahki irail kan me men rong padahk mehlel.—Mad. 7:6.
5. Mehn kahlemeng dah me Sises ketikihda ong duwen sapeng peidek kan?
5 Sises mwahngih me koapworopworki Siohwa kin kesempwal pwe en kak kapwaiada eh pwukoa doadoahk en “kadehdehda duwen me mehlel,” me pil iangahki en sapengla peidek en aramas me uhdahn men ese pasapeng mehlel kan. (Sohn 18:37) E wia kapai ehu kitail en kin kahlemengih Sises ni atail kin sapeng irail kan me “pilipildahngehr mour soutuk”!—Wiewia 13:48.