Koakon en Peidek

◼ Ihs me Pahn Audehda Kisin Koakon kan me Mi nan Neitail Pwuhk kan oh Pil Internet?

Mie kisin koakon kan nan neitail sawaspen Paipel kan me kak audauda oh pekederlahng ohpis en Sounkadehdehn Siohwa kan nan omw wasa pwehn oahte pwuhk kan de peki emen Sounkadehdehn Siohwa kan en pwarek emen aramas. Patehng met, kitail kak doadoahngki neitail Web site adres www.watchtower.org pwehn peki ehu onop en Paipel rehn emen. Ahpw mie kahpwal kan me pwarada ni en sounkalohk kan kin doadoahngki mepwukat pwehn pein koasoanehdi ong arail peneinei de pil meteikan ren ale soangen sawas pwukat.

Ekei kin kaulimkihla arail kin ale pwuhk sang ohpis en Sounkadehdehn Siohwa kan me emen sounkalohk kin oahte ong irail. Re kin medewe me atail pwihn kin kolokol neirail adres kan pwehn kin kadar ong irail pwuhk kan oh kedirepwe irail. Sounkalohk kan me kin ale pekipek en kohla pwarek emen kin kalapw sarohdi ni arail kin esehda me aramaso sohte peki ren kohla reh. Ihme kahrehda, irail kante me kin men rong me pahn pein audehda kisin koakono de wiahda pekipek nan neitail Web site, a kaidehn emen tohrohr. Ma ohpis en Sounkadehdehn Siohwa kan kin diarada me sounkalohk kan me kin audehda oaht de pekipek pwukat, eri, irail sohte pahn kapwaiada.

Eri ia duwen atail kak sewesehki atail peneinei de meteikan padahk mehlel? Ma ke men kihong neirail pwuhk, ke sou pein kadarala rehrail nin duwen kisakis ehu? Ma e kasalehda eh perenki oh men emen Sounkadehde en kohla reh ahpw ke sehse ia duwen omw pahn tuhwong elder kan nan mwomwohdiso me e karanih, ke anahne kihong sekteri en omw mwomwohdiso kisin doaropwe me adaneki Please Follow Up (S-43) pwe en tehk oh kadaralahng ohpis en Sounkadehdehn Siohwa kan nan omw wasa. Ahpw ma aramaso kin mi nan imweteng de imwen wini, ke sohte anahne wiliandi ih oh ntinglahng ohpiso. Ke kak kangoange ih en tuhwong brother kan me kin kalohkla mwo de pein ih en ntinglahng ohpiso.