Anahne Mwadang Wiahda Koasoandi

Sangete ahnsou me wekideklahn neitail Web site kohda, peki onop en Paipel nan online tohtohla. Pil me tohto peki onop en Paipel sang wiepe kapw kan en kalohk ong wehipokon. Ohpis en Sounkadehdehn Siohwa kan kin song en mwadang koasoanehdi mepwukat. Karasepe, ma pekipek ehu kohda nan jw.org, elder kan me mi wasa me aramas me men rongo kousoan ie pahn alehdi pekipeko sang ohpis en Sounkadehdehn Siohwa kan mwurinte rahn riau. Ahpw mie ripoht kan sang nan kalohk me kasalehda me mie ekei me peki onop en Paipel ahpw sohte me kin pwarala tuhwong irail erein wihk kei. Ia duwen atail kak tehk mwahu ma sawas kohieng aramaso me peki onop en Paipel mwohn eh sohla men rong?​—Mark 4:14, 15.

Ma aramas men me sohte kin kousoan nan omw wasahn kalohk kasalehda me e perenki rong, mwadang audehda doaropwehn Please Follow Up (S-43) oh kihong sekteri en mwomwohdiso ni ahnsoun mihting de mwowe sang. Erein rahn ehu de riau Sekterio anahne padahkihong mwomwohdiso me konehng duwen met de kehsehkin ohpis en Sounkadehdehn Siohwa kan ni eh doadoahngki Congregation tab nan jw.org. Elder kan anahne kaukaule tehk Web site. Ma re alehdi kaweid en tuhwong emen, re pahn anahne mwadang wiahda koasoandi. Sounkalohk me elder kan peki en kohla tuhwong aramaso anahne medewe me met mehkot kesempwal. Ma aramaso sohte mi ni imweo, mwein ke kak kihdi ehu kisinlikou me noumw adres oh nempehn delepwohn mi powe.