Koakon En Peidek
◼ Ia duwe, e konehng sounkalohk kan en isaneki doadoahngki Internet pwehn kalohkohng de onop rehn emen me re sehse me kin mihmi nan ehu sahpw tohrohr?
Ekei sounkalohk kan doadoahngkihier Internet pwehn wiahda onop en Paipel kan nan sahpw kan me atail doadoahk keinapwidi de wasa me malaulau sounkalohk kan ie. Ekei pak, e kin pweida mwahu. Ahpw, mie soangen keper kan ni ahnsou me sounkalohk kan kin koasoiong emen nan wasa ehu nan Internet de email ong emen me re sehse. (Menlau kilang Atail Doadoahk ong Wehio en July 2007 pali 7.) Mendahki kahrepen ar kin sosohng en rapahki emen me nan kapehd mehlel en rong rongamwahu en Wehio, met kakete kahrehiong brother de sister emen en patehng emen me wia werek suwed, de irail me kesehla oh uhwongada kaudok mehlel. (1 Kor. 1:19-25; Kol. 2:8) Oh pil nan sahpw kan me atail doadoahk en kalohk keinapwihdi de sohte mweimwei, irail kan me ahneki manaman en sahpw pwukat kin mwasamwasahn soangsoangen wiepen pehsepene kan me wiwiawi nan sahpwo.Soangen pehsepene pwukat ele kakete kahrehiong riatail brother oh sister kan nan keper. Ihme kahrehda, sounkalohk kan en dehr doadoahngki Internet en rapahki aramas akan nan sahpw teikan pwehn ehukihong irail rongamwahwo.
Ihte ma ohpis en Sounkadehdehn Siohwa kan en sahpwet kihda kaweid ong kitail me ma kitail kin kalohk ni ahnsou sohte lipilipil oh tuhwong emen me kitail sehse me mwemweitdo sang ehu sahpw tohrohr, kitail en dehr song en pehsengiong pwehn kalaudehla eh men rong mwurin eh pwurala eh wasao. Ahpw, kitail kak kasalehiong me e kak doadoahngki jw.org en alehdi ire de ia duwen eh kak ntinglahng ohpis en Sounkadehdehn Siohwa kan nan eh wasao. Kitail pil kak kangoangehki en mwemweitla ni ehu Wasahn Kaudok me karanih imweo. Ahpw mehlel, ekei sahpw sohte Wasahn Kaudok kan. Ahpw ma e mwahuki Sounkadehde kan nan eh wasao en kalohkdo reh, kitail anahne audehda Please Follow Up (S-43) oh kihong sekteri, me pahn uhd kadaralahng jw.org. Ohpis en Sounkadehdehn Siohwa kan me kin wia doadoahk nan sahpw me aramaso me men rong kin kousoan ie kin ese soangen irair kan wasao oh pahn kak kihda sawas kan me pahn kak sewese aramaso.—Menlau kilang Atail Doadoahk ong Wehio en June 2014 pali 7, oh pil Atail Doadoahk ong Wehio en November 2011 pali 2.
Ma aramas emen me kitail kin kalohkohng ahnsouwet keseula nan ehu sahpw tohrohr de ma aramas emen me kitail kin onop reh ahnsouwet nan Internet, kitail en idawehn kaweid kan me kileldi nan iren mwowe kan. Ahpw, ele kitail kak kakairada en aramaso eh men rong lao sounkalohk kan nan eh wasao tuhwong ih oh pousehla eh onop. Mendahki met, ma e kin kousoan nan sahpw me atail doadoahk en kalohk keinapwidi ie, kitail anahne kanahieng ni mehlel mwomwen atail kin doadoahngki kisinlikou, delepwohn, de dipwisou teikan ni atail kin koasoiaiong ih duwen oaralap en Paipel kan.—Mad. 10:16.