Sohte Kin Saloh ni Omw Kalohk nan Wasahn Pesines kan
1. Dahme kahrehda kitail en dehr nsensuwed ma kitail pehm me kitail kin saloh ni atail kin kalohk nan wasahn pesines?
1 Ke kin saloh ni omw kin kalohk nan wasahn pesines? Ma ei, ke dehr nsensuwed, pwehki mendahki Pohl sounkalohk eimah oh soh masak men, Koht anahne ketin kakehlailih pwe en kalohk. (1 Des. 2:2) Kitail pahn koasoiapene ekei kahpwal akan me kitail kin kalapw lelohng oh pil sawas kan pwe kitail en powehdi irail.
2. Dahme kahrehda kitail en dehr pwunodki kedirepwe tohndoadoahk kan?
2 Atail Koasoiong Tohndoadoahk kan Pahn Kedirepwe Irail? Nan wasahn pesines tohto, tohndoadoahk kan kin sewese aramas akan me kin kohdo rehrail, eri re kin kasik aramas en koasoiong irail. Irail pahn kin kalapw kadek pwehki mwein re leme me ke pahn pwain mehkot sang rehrail. Ni omw kin likouda mwahu oh kin kadek, ke pahn kamwakid irail ren waunekin uhk.
3. Ia duwen atail sohte pahn kedirepwe soun netinet kan?
3 I Pahn Anahne Padahk Mwohn Aramas Tohto? Ma kak, pilada ahnsou ehu me sidohwa kan sohte uhdahn kedirepw, duwehte ahnsou me re ahpwtehn ritida. Awih lao kaunen sidohwa de tohndoadoahko kelehpwla mwohn omw pahn kohla reh. Wia omw padahk ni mwotomwot.
4. Dahme kitail kak nda ni atail kalohk wasahn pesines kan?
4 Dahme I Pahn Nda? Koasoiong aramaso me apwalih wasao ma mie ekei tohndoadoahk kan. Mwein ke kak nda: “E kin apwal en diar tohndoadoahk kan ni imwarail kan, kahrehda se kin pwarodo ni omw wasahn doadoahk. I ese me ke wie doadoahk, eri I pahn koasoi ni mwotomwot.” Pwe irail en dehr medewe me kitail kin netiki neitail pwuhk kan, e kin keieu mwahu en sohte koasoia duwen koasoandi en sawas en mwohni ma re sohte idek rehtail ia wasa mwohni ong atail doadoahk kohsang ie. Nan ekei wasahn pesines kan, e pahn mwahu en peki rehn kaunen wasao ma ke kak koasoiong tohndoadoahk kan ni mwotomwot. Eri kapwurehiong dahme ke nda ni tapio ong irail. Ma tohndoadoahk men mwomwen kedirepw, kamwotehla omw padahko oh kihong ih nah kisin doaropwe. Ma ke sohte kak koasoiong tohndoadoahk kan, mwein re pahn mweidohng uhk ken kihdi pwuhk kan nan pere de wasa kan me re kin kommoal ie.
5. Ia kahrepe kan kitail en dehr saloh ni atail kin iang kalohk nan wasahn pesines kan?
5 Sises oh Pohl sohte kin saloh ni ara kin kalohk ong aramas akan nan arail wasahn pesines kan, oh ke pil kak wia met. (Mad. 4:18-21; 9:9; Wiewia 17:17) Peki rehn Siohwa en ketin seweseiuk ken ahneki mohngiong meleilei oh ken eimah. (Wiewia 4:29) Kereniong wasahn pesines koaros kitail kak tuhwong aramas, eri dahme ke sou song wiepen kalohk wet me kin pweida mwahu?