Iren Sawas Siluh Pwehn Kamwahwihala Omw Padahk
1. Dahme kahrehda kitail en nantihong kamwahwihala atail padahk?
1 Sounkalohk koaros kin wia sounpadahk kei. Sohte lipilipil ma kitail ahpwtehn tuhwong tohnihmw kan, pwurala pwehn kalaudehla arail perenki rong, de onop Paipel rehn aramas, kitail kin kihda padahk. Dahme kitail kin padahngki wia mehkot tohrohr. Kitail kin kamarainihki aramas akan “Pwuhk Sarawi” me kin ‘kasalehiong irail erpit me kak kahluwairaillahng nan mour soutuk.’ (2 Tim. 3:15) Ia uwen met eh wia pwais kaselel ehu! Iet akan iren sawas siluh pwehn kamwahwihala omw padahk.
2. Ia duwen atail kak padahk ni sansal oh mengei?
2 Sansal oh Mengei: Ni atail kin uhdahn wehwehki duwen padahk ehu, e kak mengei en manokehla ia uwen apwal en padahko ong irail kan me sohte wehwehki. Eri, ni atail kin wia onop Paipel rehn aramas, kitail en dehr kapatahiong ire teikan me sohte anahn ahnsowo. Kitail en kasalehda ire kesempwal kan. En wia padahk mwahu sohte wehwehki me kitail en doadoahngki lokaia tohto. (Lep. Pad. 10:19) E kin keieu mwahu en wadekete iren Paipel kan me kesempwal. Mwurin omw wadek iren Paipel ehu, koasoiahte wasa nan ireo me dokedoke dahme kumwa onopki. Kapahrek en Pohn Dohl me kileldi nan Madiu irelaud 5-7 kin koasoia padahk audapan kan, ahpw Sises ketin padahk ni mengei, sansal oh pilada mahsen kan me konehng oh mwotomwot.
3. Dahme kahrehda e kesempwal en doadoahngki karasaras kan? Soangen karasaras dah kan me keieu mwahu?
3 Karasaras kan: Karasaras kan kin kamwakid madamadau, pepehm oh kin sewese kitail en tamanda mehkan. Dehr leme me ke anahne wia emen soun soai saman men pwehn wiahda karasaras mwahu kan. Sises kin kalapw ketin doadoahngki karasaras mwotomwot oh mengei kan. (Mad. 7:3-5; 18:2-4) E pil mwahu en doadoahngki mahlen mengei kan pwehn karasahda mehkot. Ma ke kin kaunopada mwahu, met pahn seweseiuk ken medewehda soangen karasaras kan me kak kamwakid aramaso.
4. Ia duwen atail kak doadoahngki mwahu peidek kan?
4 Peidek kan: Peidek kan kin kahrehda noumw tohnsukuhlo en madamadau. Kahrehda, ken kanengamah mwurin omw idek peidek ehu. Ma ke mwadangete pein sapengala peideko, ke sohte pahn uhdahn ese dahme noumw tohnsukuhlo wehwehki. Ma eh pasapengo sapwung, mwein e mwahu en doadoahngki peidek teikan me pahn sewese ih en rapahkihda pasapeng pwungo sang omw pahn mwadangete kapwungala ih. (Mad. 17:24-27) Ni mehlel, sohte emen rehtail me wia sounpadahk unsek men. Kahrehda, Paipel kin kangoange kitail en tehk mwahu mwomwen atail kin padahk. Atail wia met pahn wahdohng kitail oh pil meteikan me kin rong kitail kapai soutuk.—1 Tim. 4:16.