Doadoahngki Padahk Mengei kan
1. Dahme kin kesempwal pwehn wia padahk mwahu oh sansal?
1 E inenen kesempwal en doadoahngki padahk mengei kan pwehn sewese aramas akan en sukuhlki padahk mehlel. En kin medemedewe sapwellimen Sises elen padahk kak sewese kitail en kamwahwihala atail “koahiek en padahk” pwehki ih me Sounpadahk me keieu lapalap.—2 Tim. 4:2, NW; Sohn 13:13.
2. Dahme kitail anahne doadoahngki nan atail padahk kan? Ia duwen met kak kamwakid aramas akan?
2 Doadoahngki Lokaia Mengei: Kapahrek en Pohn Dohl kin audaudkihda padahk mehlel kan me emen ohl wia ni lokaia mengei oh sansal. (Mad., irelaud 5-7) Pokono me rongorong Sises kin “pwuriamweikihla kowahlap duwen mwomwen eh kin ketikihwei sapwellime padahk.” Sounpei kan me kohla en salihdi ih koasoia: “Sohte mehmen me kin padahk duwehte ohlo!” (Mad. 7:28, 29; Sohn 7:46) Kitail sohte anahne doadoahngki lokaiahn meing, lokaia kan me apwal en wehwehki, de karasaras oaritik kan pwehn kahrehiong aramas en kamehlele dahme kitail kin padahkihong irail. Padahk mehlel kak sansal mwahu ni atail kin kawehwe ni lokaia mengei kan.
3. Dahme kahrehda ekei sounkalohk kan kin men koasoia ire tohto kan? Ia duwen kitail en nantihong en dehr wia met?
3 Koasoanehdi Uwen Ire kan me Ken Koasoia: Sises kin ketin medemedewe ia uwen ire kan me konehng e pahn ketin padahkihong irail kan me kin rongorong ih. (Sohn 16:12) Kitail anahne tehk mwahu pwe kitail en kak wekidala atail padahk kan ni atail pahn koasoi ong atail peneinei kan, irail kan me kitail ahpwtehn tuhwong, de seri kan. Kitail anahne kanahieng en dehr koasoia ire kan me nohn tohto mendahki ma re mwomwen perenki rong. Irail kan me ahneki mohngiong mehlel pahn doulahte kalaudehla arail esehla Koht mehlel, Siohwa.—Sohn 17:3; 1 Kor. 3:6.
4. Dahme kahrehda kitail anahne koasoia ire kesempwal kante?
4 Koasoiahte Ire Kesempwal kan: Sises sohte kin ketin wiahda sapwellime padahk kan en apwal en wehwehki ni eh kin ketin padahngki ire tohto kan. Ni ahnsou me e mahsanih, “irail koaros me mihmi nan sousou kan pahn . . . pedoisang nan arail sousou kan,” e mwahngih me met kaidehn ahnsou konehng en kawehwehda duwen pwihn riau kan me pahn iasada. (Sohn 5:28, 29) Ni atail pahn wia onop en Paipel kan, kitail anahne doadoahngkihte ire kesempwal kan oh nantihong en dehr kapatahiong ire teikan me sohte anahn oh sohte mi nan pwuhk me kitail kin doadoahngki.
5. Soangen kapai dah kan kitail pahn kak alehdi ma kitail pahn doadoahngki padahk mengei kan?
5 Kitail kin uhdahn kalahnganki pwe Siohwa kin ketin padahkihong kitail soahng koaros me kitail anahne ese ni elen mengei! (Mad. 11:25) Kitail men doadoahngki padahk mengei kan oh perenki pweidahn atail doadoahk en kalohk.