Doadoahk Tohrohr Ehu me Pweida Mwahu
Wihk siluh mwohn mihting tohrohr eh pahn tepida, mwomwohdiso kan pahn pwurehng iang doadoahk tohrohr en luke aramas me perenki rong ren iang towehda. Mie kahrepe mwahu ong doadoahk wet eh kin wiawi sounpar koaros. Irail me ale doaropwehn luhk oh kohdo iang mihting tohrohr kin kalapw pwuriamweiki padahk kan me kohsang Paipel, koasoandi mwahu en soangsoangen doadoahk sang irail me pein tounmetei, oh wiewia mwahu oh miniminpene me kitail kin kasalehda. (Mel. 110:3; 133:1; Ais. 65:13, 14) Patehng met, atail doadoahk tohrohr wet kin pweida mwahu, ahpw mehlel, wasa me aramas me perenki rong anahne seiloak sang wasa doh pwehn iang towehda mihting tohrohr?
Mwurin mihting tohrohr en pahr 2011, ehu ohpis en Sounkadehdehn Siohwa kan alehdi kisinlikou ehu sang rehn emen lih me diar doaropwehn luhk ni eh wenihmwo. E kin rukala ni Sounkadehdehn Siohwa kan ar kin letelet ni imweo. E ntingihedi: “Mie imwei kaselel, ei pwoudo mwahu, oh I kin leme me I ahneki soahng koaros me pahn kahrehiong ie peren. Ahpw I sohte peren, oh sohte mie kahrepen ei mour. Kahrehda, I lemehda en tangahki mwail 200 pwehn iang towehda prokram ong Rahn Kaunopo.” E uhdahn perenkihda mihting tohrohro kahrehda e eker eh pwoudo nan delepwohn oh ndaiong me e pahn pweidi oh iang towehda Rahn Sarawio. “I rong padahk koaros, I tuhwong Sounkadehdehn Siohwa tohto, oh I lemehda me I sohte men met en uhdi.” Mwurin eh pwurala imweo, e tepida onop oh mwurin sounpwong pahieu e wiahla sounkalohk men me saikinte papidais. “I uhdahn perenki ei diarada doaropwehn luhko ni ei wenihmwo pwehki uhdahn mie kahrepen ei mour met!”
Ekei me ale doaropwehn luhk pahn iang towehda. Kahrehda kitail en ngoangki iang doadoahk tohrohr kesempwal wet. Wahla luhwen doaropwe ko wasahn mihting tohrohr, oh doadoahngki mepwukat nan kalohk ni ahnsou sohte lipilipil.
[Kaokon nan Pali 5]
Ia Duwen Atail Pahn Kihla Doaropwehn Luhk?
Pwehn kanekehla atail wasahn kalohk, mwein kitail anahne koasoi ni mwotomwot. Ele kitail kak nda: “Kaselehlie. Se iang doadoahk me wiawi nan sampah pwon en kihseli doaropwehn luhk wet. Iet sapwellimomwien. Ke pahn kilang ire teikan nan doaropwe wet.” Kasalehda ngoang oh peren. Ni atail pahn iang doadoahk tohrohro ni imwin wihk kan, kitail pil anahne kihla Kahn Iroir ni ahnsou me konehng.