Luhk Tohrohr Ehu
1. Iahd me doadoahk tohrohr en luhk ong mihting tohrohr pahn tepida?
1 Ma ke kaukaunop kamadipw ehu ong kompoakepahmw kan de omw peneinei, soangen kamadipw ehu me anahne doadoahk oh doadoahngki mwohni laud, kahrehda ke pahn ngoangki luke irail. Duwehte met, ni karasaras, doadoahk laud wiawihdahr pwehn kaunopada kamadipw ehu me pahn wiawi nan atail mihting tohrohr me pahn wiawi. Tepida sang wihk siluh mwohn mihting tohrohro, Siohwa ketin mweidohng kitail en ahneki pwais kaselel en luke meteikan en iang towehda mihting tohrohro. Dahme pahn sewese kitail en kalaudehla atail ngoangki luke aramas akan?
2. Dahme pahn kamwakid kitail en wia uwen atail kak en iang doadoahk tohrohr wet?
2 Kitail pahn men wia uwen atail kak en iang doadoahk tohrohr wet ma kitail kin medemedewe ia uwen atail kin paiekihda kamadipw wet me Siohwa kin ketikihda ni atail mihting tohrohr kan. (Ais. 65:13, 14) Kitail pil anahne tamataman me atail doadoahk tohrohr en luhk me kin wiawi sounpar koaros kin pweida mwahu. (Kilang koakon “E Kin Pweida Mwahu.”) Ekei me kitail luke pahn iang kitail towehda mihting tohrohr wet, ah ekei soh. Ahpw, sohte lipilipil meh depe me pahn towehda, atail nannanti nan doadoahk tohrohr wet pahn kawauwih Siohwa oh pahn kasalehda sapwellime kadek sapan.—Mel. 145:3, 7; Kaud. 22:17.
3. Ia duwen atail pahn kihla doaropwehn luhk wet?
3 Ehuehu pwihn en elder kan anahne koasoanehdi ia duwen tohnmwomwohdiso ar pahn kihla luhk nan wasahn kalohk, oh pil ma anahne kihdi luhk ni ihmw kan me sohte towe de kihseli wasa kan me aramas kalapw kohla ie. Ma konehng, ni imwin wihk kan, kitail pahn kihla doaropwehn luhk iangahki Kahn Iroir. Ma doadoahk en kihla luhk wiawi ni tepin Rahn Kaunop en sounpwongo, kangoang anahne wiawi en soangen kihseli mahs luhk sang tapiada onop en Paipel. Mwurin doadoahk en luhk wet imwisekla, ia uwen atail pahn perenki ese me kitail ngoangki iang doadoahk wet oh kitail luke uwen aramas tohto me kitail kak en iang kitail towehda kamadipw wet me Siohwa ketikihda!